Уһук Илин олохтоохторугар анаан сөмөлүөтүнэн көтүүгэ көрүллэр чэпчэтиилээх билиэтинэн туһанааччы кэккэтэ сотору кэминэн хаҥыан сөп. Владимир Путин бэҕэһээ таһаарбыт сорудахтарын испииһэгэр ол туһунан эмиэ этиллэр.
“Уһук Илин эрэгийиэннэригэр көтөр аалларынан дьону тиэйии киэҥ хабааннаахбуоларын хааччыйар бырагыраамалары кэҥэтэргэ этиитэ киллэриҥ, онуоха сааһынан хааччахтааһыны устарга болҕойуҥ”, - диэн Путин сорудахтаабын. Кини ааспыт сыл ахсынньы 23 күнүгэр буолбут Госсэбиэт уонна Стратегическай сайдыыга, нацбырайыактарга Сэбиэт холбоһуктаах мунньахтарын түмүгэр маннык быһаарыыны ылынна. РФ Бырабыыталыстыбата уонна Госсэбиэт көлөҕө хамыыһыйата эрэгийиэннэрдээҕи уонна олохтоох салгын аалларынан тиэйии бырагыраамаларын кэҥэтэргэ этиилэрин киллэриэхтээхтэр. Сорудаҕы толоруу б.дь. кулун тутар 15 күнүгэр диэри болдьохтонно.
Быйылгы бүддьүөккэ Уһук Илинтэн, Симферопольга уонна Калининградка көтүүлэри субсидиялааһыҥҥа 3,8 млрд солк. угуллубут. Онтон ахсынньы 31 күнүгэр бырабыыталыстыба бэрэссэдээтэлэ Михаил Мишустин Владимир Путинныын көрсүһэригэр Уһук Илиҥҥэ салгын аалларынан көтүүнү субсидиялыырга эбии 5 млрд солк. көрөр буолбуттарын туһунан иһитиннэрэн турар.
Санатан эттэххэ, чэпчэтиилээх билиэтинэн Арассыыйа 23-гэр диэри саастаах олохтоохторо, эр дьон 60, дьахталлар 55 саастарын ааспыт буоллахтарына итиэннэ элбэх оҕолоох дьиэ кэргэн чилиэннэрэ туһанар кыахтаахтар. Ону тэҥэ маннык тарыып I бөлөххө хапсар инбэлииттэргэ уонна кинилэри арыаллааччыларга, төрүөхтэриттэн II уонна III бөлөхтөргө киирэр инбэлиит дьоҥҥо тарҕанар.