Өрөспүүбүлүкэҕэ балыктаныан сөптөөх сирдэр испииһэктэрэ айылҕа харыстабытын миниистирин анал бирикээһинэн бигэргэнэр. Ол ахсаана сыллата уларыйан, эбиллэн иһэр кыахтаах. Күн бүгүн оннук көҥүллээх сир, учаастак ахсаана – 1856. Аны, балыгын бултуур быраабы ыларга куонкуруһу ааһыы ирдэнэр. Онон билиҥҥитэ 940 балыктыыр учаастак (473-э өрүскэ, 467-тэ күөлгэ баар) «хаһаайынын» булан турар. Ол эбэтэр ити – балыктаныахтаах сир 50,6 %-гар тэҥнэһэр.

Төһө балык бултаныан сөптөөҕө эмиэ эрдэттэн былааннанар. Ол курдук, ааһан эрэр 2011 сылга өрөспүүбүлүкэҕэ 4690,6 туонна көмүс хатырыктаах бултаныан сөбө быһаарыллыбыта. Итинтэн бырамыысыланнай бултааһын диэҥҥэ 3922,61 т тиксэр. Оттон «любительскай» уонна «спортивнай» көрүҥҥэ балыктааччыларга  519,05 т тыырыллыбыта. Научнай чинчийэр, хонтуруоллуур сыалга былааннаммыта быйыл 32, 64 т эбит. Биллэрин курдук, балык – хоту сир олохтоохторун, аҕыйах ахсааннаах норуоттарын үгэс гыммыт олохторун укулаатыгар киирсэр, баар-суох аһыыр астара буолар. Бу сыалга 216,3 т тыырыллыбыт.