Дьокуускай куораттааҕы суут дьиэни кыттыһан тутааччылары албыннаабыт “Симиир” тутар хампаанньа генеральнай дириэктэригэр Светлана Гурьеваҕа тэриллибит холуобунай дьыалаҕа бириигэбэри таһаарда.
Сууттанааччы Арассыыйа ХК 201 ыст. 2 ч. (кэмиэрчэскэй тэрилтэ салайааччыта боломуочуйатын аһара туһанан ыар содулу таһаарыыта) буруйдааҕа толору дакаастаммыт. Суут кэмигэр биллибитинэн, Гурьева дьонтон дьиэни өлүүлэһэн тутарга дуогабардаһан, кинилэртэн улпсайа 180 мөл. солк. харчыны хомуйан баран атын сыалга туһаммыт. Түөкүн салайааччы дьоҥҥо эрэннэрбит кыбартыыратын тутуон оннугар киинэ тыйаатырын туппут, онно анал тэрили атыыласпыт, ититиилээх массыына турар сирин, буокса саалатын, атын элбэх кыбартыыралаах дьиэни тутууга ыыппыт. Инньэ гынан, эрэннэрбит үс элбэх кыбартыыралаах дьиэтэ (П.Алексеев аат. уул., 68,68/4,68/5)ситэ тутуллубатах, ол түмүгэр 142 дольщик отоойкоҕо олорбут.
Суут Гурьеваны 4 сылга уопсай эрэсиимнээх холуонньаҕа утаарда, маны таһынан икки сыл иһигэр тутууннан дьарыктанар быраабын уонна бу эйгэҕэ ханнык да дуоһунаска үлэлиирин бопто. Сууттанааччыны суут саалатыттан тутан илдьэ бардылар. Дьокуускай куораттааҕы борокуратуура бэлиэтииринэн, албыннаппыт дьон бириигэбэр күүһүгэ киирдэ да, гражданскай бэрээдэгинэн харчыларын төнүннэргэ модьуйуу түһэриэхтэрин сөп. Ол эрээри, түөкүн дьахтартан аны кэлэн тугу эмэ төннөрүөххэ сөп буолуо дуо? Саарбахтыыбыт...
Бу күннэргэ борокуратуура аны “Монолит-Строй” салайааччытыгар эмиэ ХК 201 ыст. 2 ч. тэриллибит холуобунай дьыалатын суут көрүүтүгэр ыыппыт. Бу тэрилтэ генеральнай дириэктэрэ 2014-2018 сс. 117 дольщиктан уопсаа 100 мөл. солк. ылан баран эмиэ атын сыалга туһаммытыгар уорбаланар.