Мииринэйтэн Чернышевскайга айанныыр суол диэки, “Саха сирин тыыннаах алмаастара” диэн зоопарка баар. Манна овцебыктар, кулааһайдар, тайах, таба, тыатааҕы, павлин о.д.а. бааллар.
Зоопарка ньиэп хостонор лиссиэнсийэлээх сиргэ турар буолан, соҕуруу Ленскэй диэки көһөрүллүөн сөбүн туһунан чунуобунньуктар куолулаабыттара. Эбэтэр урукку быраҕыллыбыт “Новай” (МУАД) бөһүөлэгин миэстэтигэр, Оччугуй Ботуобуйа үрэх кытылыгар көһөр кыахтаах диэн буолбута. Ленскэй диэки көһөрүөхтээх сирдэрэ Иркутскайдааҕы ньиэп хампаанньатын лиссиэнсийэлээх учаастага буолан хаалбыт. “Новай” (МУАД) эмиэ барсыбат диэн быһаарбыттар. Бу маннык балаһыанньа уонна олохтоох уопсастыбаннас утарылаһыытын күүһүнэн, күн бүгүнүгэр диэри зоопарка урукку сиригэр баар. Оттон зоопаркаттан чугас “Сүлдьүкээрнефтегаас” диэн тэрилтэ син-биир үлэтин далааһына кэҥиир. Нефтяниктар лиссиэнсийэлээх учаастактара Мииринэйтэн Чернышевскай бөһүөлэгэр тиийэ, ол эбэтэр 90-ча көстөөх сиринэн тайыыр. Бу – уруккута бултаах-алтаах сис тыалар, үрэхтэр, үрүйэлэр, күөллэр, элгэннэр уонна маардар. Манна углеводород сырьетын хостуурга, бастатан туран, геологическай чинчийии (Геологическая экспло-разведка) ыытан тураллар. Ньиэп дэлэйдик баара бигэргэтилиннэ. Онон “Саха сирин тыыннаах алмаастара” зоопарка инники дьылҕата өссө дьэҥкэтик биллибэт.
Станислав Алексеев, Мииринэй куората.