Ааспыт өрөбүллэргэ Япония Такасаки диэн куоратыгар дьахталлар тустууларыгар XVII Аан дойду Куубага түмүктэннэ
Хомойуох иһин, бу күрэхтэһиигэ Арассыыйа хамаандата кыттыбата. Тоҕо диэтэххэ, күүстээх хамаандалар былырыын Парижка ыытыллыбыт аан дойду чөмпүйэнээтин түмүгүнэн сүүмэрдэммиттэрэ.
Күүтүллүбүтүн да курдук Аан дойду Куубагар Япония хамаандата бастаата. Күн тахсар дойдутун хамаандата бэйэтин бөлөҕөр олох холкутук – Швеция (10-0), Канада (8-2), АХШ (8-2) хамаандаларын кыайталаабыта. Арай быһаарыылаах көрсүһүүгэ бу дойду хамаандатын кытта Кытай тустуук дьахталлара улаханнык эристилэр (6-4). Кытай хамаандата кэнники кэмҥэ аһара кыаҕырда. Ол курдук соторутааҕыта Кыргызстаҥҥа ыытыллыбыт Азия чөмпүйэнээтигэр алта Кытай дьахтара бастаабыта (барыта 10 ыйааһын баарыттан). Кинилэр итинник эмискэ өрө көтөн тахсыыларын Болгария исписэлииһэ Семен Штерев сүүмэрдэммит хамаанда сүрүн тириэньэрэ буолбутун кытта сибээстииллэр. Кини бу иннинэ Азербайджан эр дьоҥҥо да, дьахталларга да хамаандаларын эрчийбитэ.
Үһүс миэстэҕэ Монголия дьахталлара таҕыстылар. Кинилэр боруонса мэтээл иһин көрсүһүүгэ АХШ хамаандатын 6-4 ахсаанынан баһыйа туттулар.
Федор РАХЛЕЕВ.