Саха сирин парламеныгар хоту уонна Арктика улуустарыгар доруобуйа харыстабылын тэрийии туһунан кэпсэтии таҕыста. Хотугу аҕыйах ахсааннаах төрүт норуоттарын уонна Арктика дьыалаларыгар кэмитиэт тэрийбит парламентскай истиилэригэр дьокутааттар, доруобуйа харыстабылын министиэристибэтин салайааччылара, мэдиссиинэ үлэһиттэрэ, хотугу норуоттар бэрэстэбиитэллэрэ, хотугу уонна Арктика улуустарын, нэһилиэктэрин баһылыктара кыттыыны ыллылар.
Хоту улуустарга доруобуйа харыстабылын тэрээһинин туһунан Саха сирин доруобуйаҕа харыстабылын миниистирэ Елена Борисова иһитиннэрдэ. Кини этэринэн, Арктика улуустарыгар уонна хотугу зонаҕа исписэлиистэринэн хааччыллыы баара эрэ 60 %. 2013 сылы кытта тэҥнээтэххэ, төгүрүк суукка үлэлиир куойка 24,5 %-ҥа тиийэ аччаата. Киһи өлүүтэ өрөспүүбүлүкэ көрдөрүүтүттэн 21 % үрдүк. Ол үрдүнэн мэдиссиинэ көмөтүгэр ороскуот эрэгийиэн орто көрдөрүүтүттэн үс төгүл улахан. Фельдшерскай-акушерскай пууннар, врачебнай амбулаториялар 38 %-нара хаарбах туруктаахтар.
Миниистир бүгүҥҥү күҥҥэ үгэс буолбут мэдиссиинэ көмөтө хоту сиргэ туһата суоҕун бэлиэтээтэ. Мэдиссиинэ көмөтүн көрүҥүн оннуттан уларытар наадатын ыйда. Арктика доруобуйаҕа харыстабыла нэһилиэнньэ ахсаанынан, тарҕанан олоруутунан саҥаттан тэриллиигэ наадыйарын эттэ.
Арктика эрэгийиэнин уратытын суолталаан туран, миниистир ити эргин хомунаалынай өҥө, сөмөлүөт ороскуота ойуччу улаханынан, Арктика мэдиссиинэтин улахан болҕомтоҕо ыларга туруоруста.
Интэриниэт хаартыската
