Бүгүн Марфа уонна Сергей Расторгуевтар ааттарынан Саха судаарыстыбаннай сииркэтэ Арассыыйа бастыҥ исписэлиистэрин кытта туруорбут «Сэлии дойдута» (Земля мамонта) чаҕылхай этно-шоутун генеральнай репетициятын көрдөрдө. Дьокуускай к. олохтоохторугар уонна ыалдьыттарыгар туруорууну көрдөрүү муус устар 15 күнүгэр саҕаланар.
Суруналыыстары кытта пресс-кэмпириэнсийэҕэ бырайыак салайааччыта Сергей Расторгуев бу этно-шоуну атын куораттарга илдьэн Саха сирин уратытын уонна баай култууратын көрдөрөр соруктаах туруорбуттарын бэлиэтээтэ. Туруоруу сүрүн режиссера «Росгосцирк» ФКП сүрүн режиссера Елена Петрикова, туруорааччы-хореограф Наталья Новичкова, композитор Дмитрий Машков, көстүүм худуоһунньуктара Надежда Русс уонна Марина Галинчикова буоллулар. Кинилэри кытта, биллэн турар, бэйэбит сииркэбит тумус туттар үлэһиттэрэ - сүрүн режиссер Мария Попова-Харлампьева, балетмейстер Марияна Саморцева, сүрүн худуоһунньук Петр Винокуров бу этно-шоу күн сиригэр тахсарыгар үлэлээтилэр.
Этно-шоу премьератыгар Орто Азия уонна Уһук Илиҥҥи сииркэлэр дириэктэрдэрэ ыҥырыллан сырыттылар. Ытык-мааны ыалдьыттар истэригэр Астана к. сииркэтин генеральнай дириэктэрэ Ерик Жолжаксынов, Казахстан судаарыстыбаннай сииркэтин дириэктэрэ Максат Жаиков, Таджикистан судаарыстыбаннай сииркэтин генеральнай дириэктэрэ Бахтиер Рахматуллозода, Кыргыстаан судаарыстыбаннай сииркэтин уус-уран салайааччыта Руслан Кубанычбеков, Владивосток судаарыстыбаннай сииркэтин дириэктэрэ Юрий Кузнецов, МГИК преподавателэ, балетмейстер Наталия Новичкова, «Росгосцирк» ФКП сүрүн режиссера, Удмуртия норуодунай артыыһа Елена Петрикова бааллар.
Бүгүҥҥү генеральнай репетицияҕа саалаҕа дьон толору кэлбит. Сергей Васильевич хамаандатынан бииртэн биир чаҕылхай нүөмэрдэр тахсан истилэр: акробаттар уонна жонглердар, салгын гимнастара, хаски боруодалаах ыттар бөлөхтөрө, хотугу табалар, мэкчиргэлэр, хара саһыл, кырса уонна, биллэн турар, күлүүлээх клоуннар. Көрөөччүлэр туруоруу декорациялара, артыыстар көстүүмнэрэ сиэдэрэйин сөхтүлэр-махтайдылар. Чэ, быһыыта, киһи тылынан сатаан кэпсээбэт кэрэ көстүүлэрэ, ураты нүөмэрдэрэ буоллулар, ытыс тыаһа хабыллан олордо. Онон, сииркэбит сылы быһа бэлэмнээбит туруоруутун хайаан да көрүҥ, көтүтүмэҥ.
Бэйэ кэр.
