Минскэй кэпсэтиитэ, террор сэриитэ уонна “бэлэм буолуҥ” акция

13.02.2015 18:47 | Автор: Admin | Көрдүлэр: 3464   
Печать

_copy_copy_copy_copy_copy_copy_copy_copy_copy_copy_copyДьээбэ баҕайы: Донецкай уонна Луганскай норуодунай өрөспүүбүлүкэлэр сэриилэрэ Украина сэриилэрин кыайан бардылар, “хочуолга” хаайан төгүрүйдүлэр да “эйэлэһии” наада диэн буолар, сүүрүү-көтүү саҕаланар. Ааспыкка “Иловайскайдааҕы хочуол” хамсааһыны таһаарбыт буоллаҕына, бу сырыыга “Дебальцевскай”...

Дьэ, ол аатырынан Минскэй куоракка кэпсэтэрин кэпсэттилэр даҕаны, төһө олоххо киирэрин билбэтим. Арай Порошенко “ырыата ылланна” быһыылаах. Бу аҕыйах хонуктааҕыта Ляшко диэн атыыр-тыһы икки ардынан дьокутаат бэрэсидьиэнин дуомун трибунаттан үүрэ сатыы турара. Ити кимнээх эрэ “сыаптаах ыттарын” кэриэтэ киһи бадахтаах — туоратар киһилэригэр “ус” дииллэригэр майгыннаах.

Дьэ, санаан көрүҥ. Порошенко ханнык сирэйинэн Үрдүкү Радаҕа тиийэрий, ол тиийэн ДНР уонна ЛНР олохтоохторугар биэнсийэ төлүүр буоллубут диирий? Кыргыһарга сытыыланан олорор дьокутааттар ону өйүөхтэрэ үһү дуо? Украина 2015 сыллааҕы бүддьүөтүгэр НАТО 50 тыһ. киһилээх кэнтингиэнин аһатарга-сиэтэргэ сөптөөх ороскуот угуллан сылдьар диэн буолар. Ону “сепаратистар” биэнсийэлэригэр үллэриэхтэрэ дуо?

Ону таһынан чугуйуу балаһыанньатын хайдах быһаарар? Биллэн турар, радикаллар маны хотторуу, таҥнарыы курдук сыаналыахтара. Онуоха эбии Коломойскай кэтэх сэриитин уонна да атын “тутулуга суох” батальоннары, дьэ, хайдах тохтотор?

АХШ Госдепартамена бу кэпсэтиилэри улаханнык сэҥээрбэт курдук тутунна. Хаһан баҕарар буоларын курдук, биир уостарынан “биһиги — эйэ иһин” дэһэллэр, иккис уостарынан “дуогабары кэһиэххит даҕаны Украинаҕа салгыы көмө оҥоруохпут” дэһэллэр. Оттон: “Украина дуогабары кэстэҕинэ хайыыгыт?” — диэн ыйытыыга “”Утарыта туруу саҕаланыаҕыттан Украина ханнык да сөбүлэһиини кэһэ илик” диэн буолла. Ол аата тугуй?

Итини маннык өйдүөххэ сөп: “Кэпсэтиини кэһии син биир тахсыаҕа (ону баҕас оҥоруохпут!); кэһиигэ буруйдаах эрдэттэн биллэр (ДНР уонна ЛНР); Украинаҕа син биир көмөлөһүөхпүт (сэрии сэбинэн хааччыйыахпыт!).

Порошенконы тохтотуу Янукович кэппит кэбигэр майгынныан сөп. Куһаҕанын талан эттэххэ, полковник Каддафи дьылҕатын халыыбынан.

Оттон Яценюк уонна Турчинов диэн дуусаларга, эгэ эрэ, сэрии наада. Алдьархайтан ас таһаарыныы, экэниэмикэ эстиитин сэриинэн, Арассыыйа адьырҕатынан сабыныы... Саатар эрэ.

Аны туран, Новороссияҕа “ураты статуһу” биэрии диэн баар. Биллэн турар, Молдавияҕа киирэр эрээри “ураты статустаах” Приднестровье баар. Ону үтүктүөххэ сөп этэ буолан баран, манна АХШ сөбүлэһиэ суоҕа — сэрии наада!

Рада сөбүлэһэрэ саарбах. Бэрт соторутааҕыта Донбасс “ураты статуһун” устарга дылы этэ.

АХШка сэрии наада — аан дойдутааҕы валютаны, ол аата дуоллары быыһыыр инниттэн. Ол аата бу сэриигэ ыраах-чугас диэн өйдөбүл суох. Биһиги эмиэ хабыллабыт.

“Кыым” хаһыакка мин суруйан турабын — “террор сэриитэ” диэн тугун. Холобур, Грознайга бэрт соторутааҕыта алта террорист Бэчээт дьиэтин төһө уһуннук тута сыппыттарай? Барыта 14 быраабы араҥаччылааччы байыаһы өлөрөн, 36 байыаһы бааһырдан туран. Бу — Чечня курдук террору утары сэриилэһэ үөрүйэх дойдуга! Оттон атын ханнык баҕарар куоракка уонча террорист киирдин? Арай бу этэрээт хас да буоллун? Хас да куоракка тэҥинэн киирдиннэр? Туох барыта тохтууругар, аана суох алдьархай, иинэ суох иэдээн буоларыгар тиийэр. Улахан куоракка анал үөрэхтээх боевиктары кыайар хайдах да сатаммат — олохтоохтор ортолоругар улахан сиэртибэтэ суох.

Дьэ, маннык сэриини ыытарга Арассыыйа хонноҕун анныгар сытар хам аччык дойду наада. Эстибит-быстыбыт, кырыгырбыт, икки хараҕа бүөлэммит Украина. Кэппиэйкэ иһин боевиктары сүүмэрдииргэ!

Олохтоох интернет форумнарыгар саха дьоно суруйарын аахтахха, бу сэриини олус ыраах, ону ааһан “нуучча-хохуол” сэриитин курдук санааччы үгүс эбит. Онно сэриилэһэр дьону “акаарылартан” атыннык ааттаабаттар.

Ону баара, террор сэриитигэр аан бастаан национальнай өрөспүүбүлүкэлэргэ охсуулары оҥоруохтарын сөп. Арассыыйаны хол-буут араартаары, иһиттэн бытарытаары, утарыта турууну таһаараары.

Кэлиҥҥи кэмҥэ “саха оҕолоро сэриигэр маассабайдык бараллар (Арассыыйа соруйан ыытарын курдук этэллэр), онно кинилэри өлөр өлүүгэ умса анньаллар, чугуйаары гыннахтарына пулеметунан ытыалыыллар үһү” диэн “айманааччы” олус элбээтэ. Бадаҕа, бэлэмнииллэр дуу, тугуй?

СУР.