Ааспыт күн киэһэтигэр, Саха сирин быыһыыр сулууспатыгар «112» нүөмэринэн эрийэн, Дьокуускай куорат Бүлүүлүүр суолугар тэллэйдии барбыт дьон муммуттарын туһунан иһитиннэрии киирбит.
Дьоһуурунай симиэнэ быыһааччылара тутатына муммут дьону көрдүү туруммуттар. Быыһыыр сулууспа дьоһуурунайа муммут дьоннуун сибээстэһэ сылдьыбыт, сири-уоту ойуулаан көрдөрбүттэринэн сирдэтэн, муммут дьон баар буолуон сөптөөх тыаларыгар быыһааччылары салайан ыыппыт.
Саха Өрөспүүбүлүкэтин Быыһыыр сулууспатын симиэнэтин салайааччыта Александр Мостахов иһитиннэрбитинэн, муммут дьахтары уонна эр киһини түүн булбуттар.
«Тыаҕа барар буоллаххытынына, толору ииттэриилээх мэбиилинэй төлөпүөҥҥүтүн умнумаҥ. Бу түбэлтэҕэ суотабай сибээс баар буолан көрдөөһүн үлэтэ түргэн буолла. Халлаан туругун көрөн сөбүгэр таҥныҥ, ордук чуолаан киһи хараҕар быраҕыллар, от-мас быыһыгар чаҕылхайдык көстөр өҥнөөх таҥастары кэтиҥ. Чугас дьоҥҥутугар, аймахтаргытыгар хайаан даҕаны хайа диэки барбыккытын, хаһан кэлиэххитин сөбүн туһунан этэн баран, тыаҕа тахсыҥ. Өскөтүн муннаххытына, биир сиргэ туруҥ», - диэн быыһааччы киһи сүбэлиир.
Суһал сулууспаны ыҥырар нүөмэр – 112
СӨ Быыһыыр сулууспатын суһал дьоһуурунайын нүөмэрэ – (411) 45-90-19.
СӨ Быыһыыр сулууспатын пресс-сулууспата иһитиннэриититтэн
