Саха сиригэр бэс ыйыттан сорох бородуукта сыаната чэпчээбит. Эрэгийиэммитигэр сыана хайдах уларыйбытын туһунан Сахастат кэпсиир.
Ол курдук, сибиэһэй оҕурсу 43,8%, хаппыыста 23,8%, моркуоп 5,2%, хортооппуй 3,3% чэпчээбиттэр. Ол эрээри, кэмнэрэ кэлэн, эриэппэ лууга 8,8%, оттон дьаабылыка 3,8% сыаналара ыараан биэрбит. Маны сэргэ, куурусса сымыытын сыаната 4,0%, горуох уонна фасоль 3,1%, иэдьэгэй, хара биэрэс (горуох) 3,0%, пшено бурдуга 2,5%, чэй 2,0%, балык уонна саахар 1,5%, карамель 0,5%, пичиэнньэ 0,3% сыаналара түспүт.
Аны туран, килиэп уонна бурдук астар сыаналара 3,8% уонна 2,1%, маргарин 2,2%, мас арыыта 1,9%, үүт 1,3%, ынах уонна бараан эттэрэ (куҥ эттэн ураты) - 1,1%, сымнаҕас уонна кытаанах сыыр, ынах арыыта, туустаах муора балыга (сельдь) 0,9%, туус 0,8% уонна ириис 0,7% сыаналара ыараабыт.
Бэс ыйыттан Саха сиригэр киһи аһыыр биир муҥутуур кыра бородуукта нобуорун сыаната 1,1% түспүт уонна 8881,8 солк. буолбут. Сыл саҕаланыытын кытта тэҥнээтэххэ, биир муҥутуур кыра бородуукта нобуорун сыаната 12,4% үрдээбит. Бүтүн Арассыыйа үрдүнэн от ыйыгар маннык нобуор сыаната 5 864 солк., оттон Уһук Илиҥҥэ 7 746 солк. буолбут.