Хайа баҕарар оҕо бэйэтэ айбыт остуоруйата сырдыгы, ырааһы туоһулуур. АЛРОСА Экологияҕа киинэ «Остуоруйа холуодьаһа» («Колодец сказок») диэн оҕолор остуоруйаларынан таһаарбыт хомуурунньугунан мультфильм оҥорон таһаарарга сонун уонна кэрэхсэбиллээх быһаарыныыны ылынна.
Биллэрин курдук, «Остуоруйа холуодьаһа» хомуурунньук 2021 с. сүрэхтэммитэ. Саха сирин араас улуустарыгар олорор 50 оҕо үлэтэ бу хомуурунньукка түмүллүбүтэ. Олору мультфильм оҥорон таһаарыыга Калининградтааҕы «Videosfera” диэн анимационнай устуудьуйа ылсыаҕа.
“Биһиги бырайыакпыт сүрүн сыала Ийэ айылҕабытын харыстааһын уонна төрөөбүт тылы үйэтитии буолар. Быйыл бырайыагы салҕаан, ааҕааччыларбыт баҕаларын учуоттаан, мультфильм оҥорон таһаарарга быһаарынныбыт. Билигин бу үлэҕэ бастакы хардыылар оҥоһуллан эрэллэр. Сынаарый суруллар, персонажтар толкуйданаллар. Мультфильм биир кэрэхсэбиллээх өрүтэ диэн, кини сахалыы эрэ буолбакка, нууччалыы уонна эбэҥкилии тылынан тахсыахтаах. Кылгас кээмэйдээх эрээри, бары өттүнэн табыгастаахтык аттарыллыбыт мультфильмҥа үс остуоруйа сюжета киириэҕэ”, — диэн АЛРОСА Экологияҕа киинин хонтуруоллуур-аналитикалыыр үлэни бырайыактааһын салаатын салайааччыта Анастасия Герасимова сырдатта.
Мультфильм сүнньүгэр киириэхтээх үлэлэри билиһиннэрдэххэ, “Лесной доктор”, “Лиса-грязнуля” уонна “Чудо-дерево” диэн айымньылар тулалыыр айылҕаны харыстыырга, бэйэ-бэйэҕэ үтүө сыһыаннаах буоларга ыҥырар ис хоһоонноохтор. Холобур, Владислава Мунтян “Лиса-грязнуля” остуоруйата дириҥ ис хоһоонноох. “Остуоруйа оҕо өйдүүрүн курдук судургутук, чэпчэкитик сурулунна. Тыла-өһө, сюжета судургутун иһин, ис суолтата олус дириҥ уонна киэҥ. Холобурга ылан көрдөххө, кирдээх, сууммат-тарааммат, бэйэтин көрүммэт киһини кытта дьон алтыһыан баҕарбата биллэр. Ол эрээри, хас биирдии киһи хаһан баҕарар көннөрүнэр кыахтаах. Ханнык баҕарар кэмҥэ кини өйдөнөн, суунуон-тарааныан, чэнчис буолуон сөбүн туһунан айымньыга этиллэр”, — диэн ааптар санаатын тириэрдэр.
СӨ Уопсастыбаннай палаататын билими, үөрэхтээһини уонна патриоттуу иитиини сайыннарыы хамыыһыйатын бэрэссэдээтэлэ Вера Жерготова бэлиэтээһининэн, бырайыак оҕо аймаҕы айылҕаны харыстааһыҥҥа уонна төрөөбүт ийэ тылы үйэтитиигэ ыҥырыахтаах.
“АЛРОСА бу бырайыагын устуоруйата туһунан ис кэрэлээх. Кини биһиги дойдубутугар олорор араас омук оҕолорун биир кынат анныгар түмэр улахан суолталаах. Иккиһинэн, бырайыак биһиги олохпутугар буола турар араас кыһалҕалаах, сытыы өрүттэри таарыйар. Холобур, төрөөбүт төрүт тылы харыстааһын, сайыннарыы, оҕо аймаҕы тулалыыр айылҕаны харыстааһыҥҥа үөрэтии оччоттон баччаҕа диэри биир сытыы боппуруос быһыытынан турар”, — диэн кини этэр.
“АЛРОСА экологическай киинэ үлэ биир сүрүн хайысхатын быһыытынан төрөөбүт тыллары өйүүр бырайыактар нөҥүө төрүт олохтоох хотугу аҕыйах ахсааннаах норуоттары өйүүрэ хайҕаллаах. Маннык бырайыактар, биллэн турар, сүтэн эрэр тыллары чөлүгэр түһэрэргэ, харыстыырга тирэх буолаллар. Биһиги АЛРОСА биисинэс уонна хотугу аҕыйах ахсааннаах төрүт омуктар интэриэстэрин икки ардыларыгар балаансаны буларга дьулуһарын сыаналыыбыт”, – диэн Ил Дархан уонна Бырабыыталыстыба дьаһалтатын тылы сайыннарыы боппуруостарыгар управлениетын салайааччыта Римма Жиркова бэлиэтээтэ.
Онон, бу олус суолталаах, интэриэһинэй уонна кэрэхсэбиллээх бырайыак АЛРОСА быһаччы көмөтүнэн кинигэ эрэ сирэйигэр буолбакка, мультипликатордар айар үлэлэригэр эмиэ үйэтитиллэн, кэлэр көлүөнэҕэ тиэрдиллэр биир кэскиллээх хардыы саҕаланна.
