Бэҕэһээ, атырдьах ыйын 2 күнүгэр, биир ыйдаах уһун куйаас кэнниттэн, эти-сиини чэбдигирдэр күүтүүлээх ардахпыт кэлэн түстэ. Ол эрээри, дохсун күүһүнэн, уута элбэҕинэн дьону-сэргэни соһутта диэтэхпитинэ сыыспаппыт буолуо.
Киһини сылатар өҥүрүк куйаас кэнниттэн ардахпыт илэ-чахчы «дьэ бу баарбын» диэбиттии, күүскэ түһэн курулаата. Дохсун самыырбыт син эрдэтээҥҥи дьыллар курдук этэҥҥэ барыбытын үөрдэ-көтүтэ түһэн ааһыа дии санаабыппыт даҕаны, киин куораппыт устун көҥүл сүүрүктэр элбээн, уулуссаларбыт байҕал курдук уунан туоллулар, сорох дьиэлэргэ уу тэстэн араллааннары үөдүтэ сырытта.
Бэҕэһээ үгүс дьон-сэргэ халлаан туругар сөбө суох таҥастаах-саптаах сылдьыбыт: зонтига суох, көннөрү кроссовкалаах, сандаалыйалаах, уһун сырдык былааччыйалаах уо.д.а. Инньэ гынан, куорат устун дьон-сэргэ сүүнэ чалбахтар устун хаамсалларыгар тиийбиттэрэ, бэл, сорох сиринэн олус дириҥ чүөмпэлэр үөдүйэн, суолу туоруур даҕаны сирдэр суох буолбуттара. Маныаха, сатыы хаамар дьон эрэ буолбакка, тимир көлөлөр эмиэ үөдүйбүт үрэхтэр устун нэһиилэ сыҕарыйан эрэйи көрдүлэр.
Массыыналар уу устун устуох айылаахтар
Оттон бу Дьокуускай аэропуордун иһэ эмиэ «ууга бара» сыста.
Саҥа тутуллубут Өрөспүүбүлүкэтээҕи кардиологическай диспансер күүскэ тэһиннэ. Саҥа тутуу маннык буолбута элбэх дьону дьиксиннэрдэ.
Аны туран, ардах анныгар аспаал оҥороллорун уураппатахтар.
Дьокуускай куорат баһылыга Евгений Григорьев бэйэтин тус телеграм-ханаалыгар этэринэн, хоммунаалынай сулууспалар үлэлэрэ күүһүрэн биэрбиттэрэ.
Хомунаалынай үлэһиттэр ууну оботтороллор.
Бу ылан көрдөххө, өрөспүүбүлүкэҕэ ууну оборор, суох гынар «вотоотведение» систиэмэтин үлэтэ соччото суох. Онон, хомунаалынай үлэһиттэр хамсаныылара олус элбэх буолара сабаҕаланар. Ол эрээри, куһаҕан үчүгэйэ суох буолбат дииллэринии, Өрөспүүбүлүкэтээҕи офтальомологическай балыыһа ууну сүүрдэр луоткалара элбэх ууну сүүрдэргэ үчүгэй туруктарын көрдөрдүлэр.
Синоптиктар этэллэринэн, Дьокуускайга ардахтар өр кэмҥэ кэлбиттэр. Онон, санааҕытын түһэрбэккэ, халлаан туругар сөп түбэһэр гына таҥнан-симэнэн, бу үөрбүт сирэйдээх эр киһи курдук сүргэҕитин өрө көтөҕөн сылдьаргытыгар сүбэлиибит.
Туһаныллыбыт матырыйаал: https://www.yakutia.kp.ru
