«Мииринэй – Дьокуускай” маршрутунан көтүү иһин дьон кэлэ-бара отучча тыһыынча солкуобайы төлүүллэр. Онуоха салайааччылар “Наһаа муҥатыйымаҥ” эрэ диэхтэрэ.
Бэл, 2018-19 сылларга, Дьокуускайдаан абыраныахпыт этэ диэн, мииринэйдэр кэлэ-бара түөрт уонча тыһыынчаны төлүү сылдьыбыттара.
Харчыгытын оннук харыстыыр буоллаххытына, таксыыта көрдөнүҥ диэччилэр да бааллар. Мииринэйтэн Дьокуускайга диэри таксыы өҥөтө - 7 тыһыынча солк. Кэлэ-бара – 14 тыһыыча солк.
Олус сылаалаах айан. 1200 биэрэстэ усталаах айаны тулуйбакка, ыарыһах, сааһырбыт киһи сыккырыыр тыына эрэ тиийэр.
Оттон Дьокуускайга сөмөлүөтүнэн көтөрбүт сыаната ыараханыгар ким да кыһаммат. Өрөспүүбүлүкэ таһымнаах чунуобунньуктар манна букатын да кыттыспаттар.
Хоту сытар улуустар сиэрэ суох үрдүк авиатарыыптары утаран, үҥсэн-харсан соруктарын ситиспиттэр. Дьокуускайдааҕы бэрэстэбиитэллэрэ, дьокутааттара тирэх-көмө буоланнар, сыаналарын кыччаттылар. Оттон Мииринэйтэн Дьокуускайга көтүү сыанатын кыччатарга модьуйсар муҥ саатар биир-икки киһи көстүбэтэ кыһыылаах.
Станислав Алексеев, Мииринэй.
Слава Gelio Степанов хаартыската.