Хоту улуустарга уонна Кэбээйигэ бөрө элбээн, улахан ночоот тахсыбыта көстөр. Ол курдук, сыччах «Сэбээн» ГУП 2100 табатын ардай аһыылаахха былдьатан 13 мөл. солк. хоромньуламмыт. Онон дириэктэр Николай Ефимов улахан бөртөлүөт оннугар дьоҕус бөртөлүөтү атыылаһан дуу, уларсан дуу туран, онон бултаатахха, ночоото арыый кыччыа этэ диэн санаалаах. Туундараҕа уонна кинилэр сирдэригэр бултааһын араастаһарын ыйар. Холобур, Ми-8 биир чаас көтөрүгэр  150 тыһ. солк. ороскуоттанар эбит буоллаҕына,  «Робинсон» киэнэ – 40-50 тыһ. халбаҥныыр диир.

ТХМ миниистирин солбуйааччы Иван Павлов итинник бөртөлүөтү өрөспүүбүлүкэҕэ аҕалбыттарын этэр. Кини эппитинэн, өрөспүүбүлүкэ үрдүнэн, уопсайа 13 тыһ. табаны бөрө тардыбыт! Онон бөрөнү бултуурга көрүллэр үбү икки төгүл элбэппиттэрин, ону сэргэ Булт департамена эмиэ үлэлэһэрин иһитиннэрдэ.  Ааспыт сылга 532 бөрө бултаммыт, биир бөрөнү өлөрбүт булчукка 15 тыһ. солк. бэриллибит. Быйылгыттан 30 тыһ. гынарга суоттаналар эбит. Чопчулаатахха, 20-тин мантан, 10-ун муниципальнай тэриллии кыттыгас үбүлүөхтээҕэ торумнаммыт. Оччотугар бултуур интэриэс улаатан, балаһыанньа тупсуо диэн суоттууллар.