Саха дьаҥы кытта былыр былыргыттан охсуһара. Онно олоҥхону киэҥник туһанара. Олунньу ыйга олоҥхону истии элбиирэ. Ол тоҕото өйдөнөр. Олоҥхону истибит дьон өйдөрө-санаалара күүһүрэн, туруктара бөҕөтүйэн, дьаҥҥа хотторбот буолан хаалаллар. Олоҥхо сайдыытын биир төрүөтэ онно сытар.

Өлөөннөр дьаҥ кэллэҕинэ ырыалаах остуол тэрийэллэрэ кэпсэнэр. Астаах остуол тула олорон уонна хас да буолан солбуһа-солбуһа ыллыыллар. Ити эмиэ олоҥхону ыарыыны утары туһаныы биир көрүҥэ. Билигин олоҥхо оннугар “үс күлүгү холбооһун” диэн туом толоруллар. Сыл устата киһи күлүгэ төһө эрэ ыһыллар. Ону холбоон, түмэн биэрэбит. Оччоҕо киһи доруобуйата тута бөҕөргүү түһэр.

Олунньу ыйга, биллэрин курдук, Дьыл Оҕуһун муоһа тостор. Онтон 24-с чыыһылаҕа моонньоох баһа туллан түһэр. Ол кэнниттэн көҥдөй көхсө хаалан баран 44 дьыбары, 44 уорааны ыыта сытар. Ол аата, 88 күн устата тымныйар.

Итини күҥҥэ-дьылга тэҥнээтэххэ маннык: олунньу 2 күнүгэр кыһын ортото буолар. Норуокка этэллэринэн, арҕахха сытар эһэ биир өттүгэр эргийэн биэрэр. Эмиэ ити эргин Дьыл Оҕуһун биир муоһа тостон түһэр. Тыына тахсаары тиһэх мөхсүүтүн мөхсөр. Ол иһин улахан тымныы эстэн биэрбэт. 10-с чыыһыла диэки эрэ тымныы намырыыр. Күн өрө ойор. Ол иһин бу кэм тыалын “күнү көтөҕөр тыал” дииллэр. Хомурах үөскээн барар. Дьыбар тахсан барар, чысхаан тыал түһэр.

Олунньу бүтүүтүгэр хотой кэлэр. Кини уйатын хаардаан барар. Ол аата, сотору көмнөх түһэр. Олунньу ортотун туһунан бэлиэтээн этэр наада: бу кэмҥэ сылыйан ылар. Ону “бастакы бэлиэтээһин” дииллэр. Ол кэннэ кулун тутар ый ортотугар буолар сылыйыыны “иккис (эбэтэр дьиҥнээх) бэлиэтээһин” диэн ааттыыллар.

Тэрис.