Ытыктабыллаах «Кыым.ру» саайт «Үрдүк күрдьүк - 2023» күрэҕин кыттааччылара! Дьэ, тыҥааһыннаах күрэхпит түмүктэннэ! Бар дьон күрдьэр кыаҕа уонна кыайыыга дьулуура сөҕүмэр эбит! Барыта 114 сайаапка киирбититтэн 74 кыттааччы хаалан куоластааһыҥҥа кытынна. Онтон биэтэккэ 57 кыттааччы тиийдэ. Көхтөөхтүк кыттыбыккытыгар ис сүрэхтэн махтанабыт уонна уопсай түмүгү биллэрэбит!
Биэтэккэ тиийбиттэр ортолоругар «Үрдүк күрдьүк - 2023» күрэх куоластааһынын кыайыылааҕынан Дьокуускай куорат 38 саастаах олохтооҕо Спартак Петров буолла! Бүгүн киниэхэ «Кыым.ру» саайт аатыттан кыайыылаах бирииһин - 3000 солкуобайы ыытыахпыт.
Дьүүл сүбэтин түмүгүнэн, «Үрдүк күрдьүк - 2023» күрэх муҥутуур кыайыылааҕынан Мэҥэ-Хаҥалас улууһун Моорук нэһилиэгин 72 саастаах олохтооҕо Никифор Скрябин буолла! Дьүүл сүбэтэ, кини күрдьүгэ үрдүгүн таһынан ырааһын, көнөтүн кэрэхсээн, туох да мөккүөрэ суох биир санааҕа кэллэ. Никифор Дмитриевич кыайыылаах чороонун уонна «Кыым» хаһыакка сыл иккис аҥаарыгар сурутуу тутуоҕа.
Дьүүл сүбэтин үлэтин түмүгүнэн, «Үрдүк күрдьүк - 2023» күрэх «Кэрэхсэбиллээх хаартыска» анал бирииһэ Горнай улууһун Бэрдьигэстээх сэлиэнньэтин олохтооҕо, биэнсийэлээх Юрий Семеновка ананна! Кини ,күрдьүгүн олус чөкөтүк күрдьүбүтүн ааһан, аттыгар үчүгэйкээн хаар киһини оҥорбутун уонна кырачаан сиэнэ оонньуу сылдьарын түһэрбитин кэрэхсии көрдүбүт. Юрий Константинович үрүҥ көмүс «Хаар» харысхалы тутуоҕа.
Бары кыттааччыларбытын саайпыт архыыбыгар бэйэҕит күрдьүккүтүн үйэтиппиккитинэн эҕэрдэлиибин уонна өссө төгүл көхтөөх кыттыыгыт иһин махтанабыт! Алаһа дьиэҕит сырдык-сылаас, тиэргэҥҥит уйгулаах-быйаҥнаах, кыстыккыт сатабыллаах, күрдьүккүт хаһаайыннаах буоллун!
