Космоновтика күнүн бэлиэтиир тэрээһин чэрчитинэн Юрий Гагарин төрөөбүт куоратыгар кини ийэтигэр Анна Тимофеевна Гагарина паамытынньыгар тыыннаах сибэкки уурдулар. Бу дьоро түгэҥҥэ Юрий Гагарин сиэн балтылара, Ю.А. Гагарин аатынан мемориальнай заповедник-түмэл үлэһиттэрэ Тамара Дмитриевна Филатова уонна Наталья Борисовна Гагарина кыттыыны ыллылар.
Сэбиэскэй Сойуус дьоруойун, нуучча улуу киһитин төрөппүт, ииппит Ийэ үрдүк аатыгар сүгүрүйэн, Саха сирин олохтоохторун аатыттан Михаил Николаев тыыннаах сибэкки дьөрбөтүн ыытта. Бэлиэтээн эттэххэ, 90-с сылларга Михаил Николаев уонна Тамара Филатова Юрий Гагарин ийэтигэр анаан паамытынньык турарыгар үлэни көҕүлээбиттэрэ. 2001 сыллаахха Саха сирин бары олохтоохторун ааттарыттан Анна Тимофеевна Гагарина паамытынньыга арыллыбыта.
Гагарин куорат олохтоохторо кэпсииллэринэн, сибэккини ууруу үтүө үгэһэ сылын ахсын тиһигин быспакка буолар. Бу тэрээһин кэнниттэн Юрий Гагарин түмэлин иһинэн үлэлиир оҕо кулуубун кыттыылаахтарыгар “Гагарин оонньуулара” диэн эстафета саҕаланар.
Ону таһынан, Саха Өрөспүүбүлкэтин бастакы бэрэсидьиэнэ М.Е. Николаев “Николаев-Киин” бибилэтиэкэ-архыыбыгар “На плечах гигантов” бырайыак үлэтин саҕалаабыта. Бастакы тэрээһин Космонавтика күнүгэр анаммыта. Бу күн Юрий Гагарин сиэн балтын кытта Тамара Филатовалыын иһирэх кэпсэтии буолан ааспыта. Юрий Гагарин аатынан мемориальнай заповедник-түмэл уонна Николаев-Киин ылсыһан виртуальнай быыстапканы оҥордулар. Манна архивнай докумуоннар, хаартыскалар, видеолар, лиэксийэлэр, уруоктар уонна викториналар бааллар.
Быыстапканы бу сигэнэн киирэн көрүөххүтүн сөп: https://nikolaevcentre.ru/virtual/49/index.html?utm_source=whatsapp&utm_medium=messenger&utm_campaign=pt-458&utm_eid=164
Бэйэ кэр.