Бастакы бэрэсидьиэн М.Е. Николаев Архыып-бибилэтиэкэтигэр (Николаев-Кииҥҥэ) Космонавтика күнүн декадата саҕаланна. Ол чэрчитинэн, муус устар 6 күнүгэр Юрий Гагарин сиэн балтын Тамара Филатованы кытта телемост буолла. Кини, урут Михаил Ефимовичтыын космонавт ийэтигэр Анна Тимофеевнаҕа пааматынньык туруоруутугар алтыспыт буолан, Саха сирин үчүгэйдик билэр уонна олус махтанар.
«Эһиги Юрий Гагарины ытыктыыр буолаҥҥыт, маннык көрсүһүүнү тэрийэҕит. Ол иһин эһиэхэ олус махтанабын. Мин төрүүрбэр Юрий 13 саастаах этэ. Биһиги икки ыалынан бары биир дьиэҕэ олорбуппут. Онтубут билигин Гагариннар музейдара буолан турар. Юрий үөрэнэ сылдьан мэлдьи кэһиилээх кэлэр этэ. Мин кинини олус кэтэһэрим уонна сөбүлүүрүм», - диэн Тамара Дмитриевна оҕолорго кэпсээтэ.
Маны сэргэ кини космонавт оҕо сылдьан оккупированнай куоракка олорбутун, сэрии кэмин эрэйин-муҥун толору билбитин, ол да иһин күүстээх санаалаах, дьулуурдаах уонна үлэһит киһи буолан тахсыбытын, хайдах курдук үтүө майгылааҕын, дьоҥҥо эйэҕэс сыһыаннааҕын, космоска тахсарга хайдах бэлэмнэммитин, ол кэннэ тугу үлэлээбитин-хамнаабытын сырдатта.
Тамара Филатованы кытта онлайн кэпсэтиигэ өрөспүүбүлүкэ араас муннуктарыттан холбоннулар. Николаев-Киин саалатыгар Өктөм оскуолаларын үөрэнээччилэрэ уонна АГАТУ филиалын устудьуоннара муһуннулар. Оҕолор улуу киһи олоҕун туһунан көхтөөхтүк ыйыттылар уонна болҕойон иһиттилэр.
Тэрээһини “Николаев-Киин” салайааччыта Юрий Семенов ыччаты маннык дьон холобуругар иитиэхтээхпит диэн санаанан түмүктээтэ.
Бэйэ кэр.