Сэтинньи 4 күнүгэр, Норуот сомоҕолоһуутун күнүгэр А.Тюняев диэн киһийдэх ютубка “Существуют ли якутские крысы” диэн сахалары үөҕэр, Арассыыйа норуоттарын иирсиһиннэрэр ис хоһоонноох видеоролигы таһаарбыта. Айдаантан Тюняев ролигын устубута.
Элбэх дьону аймаата диэн, Госдума дьокутаата Ф.Тумууһап сэтинньи 7 к. РФ Генеральнай борокуруоругар, РФ Силиэстийэлиир кэмитиэтигэр холуобунай дьыаланы көбүтэргэ ирдэбилин ыыппыт. Туруорсуутун күүһүрдээри, сарсыныгар Госдуума мунньаҕар тустаах кэмитиэттэриттэн Тюняевка холуобунай дьыала көбүтэри туруорсар сурук ыыттарары туруорсубутун, “эн ыыппыккын, сөп буолуо” диэн ылымматахтара.
Тумууһап Генборокуратуураттан суолта биэрбэт эппиэттэр кэлэн барбыттарыгар, иккиһин модьуйуу түһэрбит.
Онуоха Генборокуруор 1 солбуйааччыта А. Разинкин суруга кэлбит. Онно Тюняевы РФ административнай буруйу оҥоруу Кодексын 20.3.1 ыст. Москуба Симоновскай суутугар бэрилиннэ дэммит. Ити ыстатыйанан, буруйдаах 10-20 тыһ. солк. ыстараапка, эбэтэр 100 ч. кыһалаҥ үлэҕэ дуу, 15 хонук дуу хаайыыга ууруллар.
Тюняев бу сырыыга холуобунайдаммакка куоппут. Оттон Тумууһап дьаныһан, кыра да буоллар, дьыала тэриллэрин ситиспит. Госдума дьокутааттара норуоттарын итинник көмүскээн истиннэр.
Бэйэ кэр.
