Бу күннэргэ Арассыйа суруналыыстарын сойууһун чилиэнэ, СӨ култууратын уонна бытовой хааччыйыытын туйгуна, СӨ киинэтин бэтэрээнэ, Бэрдьигэстээх нэһилиэгин бочуотунай олохтооҕо Виктор Семенов 60 сааһын туолла. Кини өр сылларга түһэрбит хаартыскалара, суруйуулара элбэх кинигэлэргэ, хаһыаттарга бэчээттэммиттэрэ. Элбэх хаартыскалара араас куонкурустарга, быыстапкаларга үрдүктүк сыаналаммыттара.
Олунньу 20 күнүгэр Виктор Васильевич үбүлүөйдээх быыстапката Ил Түмэн дьиэтигэр үөрүүлээх-быһыыга майгыга аһылынна. Быыстапка кулун тутар 1 күнүгэр диэри туруоҕа.
Ити күн СӨ Национальнай библиотекатын историческай саалатыгар “Төрөөбүт дойдум түгэннэрин үйэтитэр дьоллоохпун” диэн фотосуруналыыс Виктор Семенов төрөөбүтэ 60 сыллаах күнүгэр аналлаах куоракка олорор биир дойдулаахтара төгүрүк остуол тэрийэн ыыттылар.
Бу күн биир дойдулаахтара Виктор Васильевич улуус историятын үйэтитэр хаартыскаларыгар дириҥ ытыктабылларын тиэртилэр, тумус туттар дьоммут Э.Ф.Данилов, П.С.Иванов, М.М.Яковлев, Г.Г.Кононов, В.И.Контоева, Н.П.Андросова, Т.Е.Слепцова Солоҕонтон төрүттээх А.А.Дамбуева, Р.Н.Иванова, билигин Майаҕа олорор Е.Е.Белолюбскай, үөрэппит учуутала Р.И.Попова үтүө дьыаланы үлэнэн киэркэйэр, кэрэни кэрэхсиир, төрөөбүт үөскээбит дойдубут үтүө түгэннэрин үйэтитэн хаалларар айымньылаах үлэтигэр ситиһиини, доруобуйаны уонна хаартыскаларын түмэн, кинигэ-альбом тахсарыгар баҕа санааларын тиэртилэр.
"Горнай түмсүү" общественнай тэрилтэтин пресс-группата
