Ил Дархан Айсен Николаев үүммүт сылы Үлэ сылынан биллэрбитинэн, СӨ Үлэҕэ уонна социальнай сайдыыга министиэристибэтэ Үлэ сылын логотибын оҥорууга күрэс биллэрбитэ. Бырабыыталыстыба бэрэссэдээтэлин солбуйааччы Ольга Балабкина иһитиннэрбитинэн, барыта 80 логотип бырайыага киирбититтэн дьүүллүүр сүбэ, Үлэ сылын суолтатын ордук үчүгэйдик арыйар диэн сыаналаан, Матвей Новиков уруһуйун талбыт.
Логотип төгүрүк быһыылаах. «Кымырдаҕас ойуу» оһуорунан киэргэтиллибит. Биллэрин курдук, сахаларга төгүрүк быһыы күнү, олоҕу, сомоҕолоһууну, харысхаллаах буолууну бэлиэтиир. Оттон кымырдаҕас үлэһит, тулуурдаах, кыһамньылаах буолууну кытта дьүөрэлэһэр. Логотип ортотугар илиилэриттэн тутуспут дьону киллэрбиттэр. Оттон үөһэ өттүгэр барыбытын биһиктиир, киһи гынар аналлаах ураһабыт ойууламмыт. Аллара өттүгэр күүстээх үлэни бэлиэтиир “шестеренканы” киллэрбиттэр.
Логотипка Саха сирин чэлгийэ турар ходуһаларын, сүүрүгүрэ турар өрүстэрин көрдөрөр от күөҕэ уонна халлаан күөҕэ өҥнөрү туһаммыттар. Онон, манна төрүт үгэс уонна аныгы кэм тэтимэ үчүгэйдик көстөр диэн этиэххэ сөп. Логотибы Үлэ сылыгар сыһыаннаах бары тэрээһиннэргэ туһаныахтара.
Сонун төрдө: CӨ Бырабыыталыстыбатын уонна Ил Дарханын пресс-сулууспата
