Оҕону ааттааһын хаһан баҕарар уустук, ону тэҥэ эппиэтинэстээх. “Аат-суол” диэн мээнэҕэ этиллибэт. Оҕону хайдах ааттыыгын да, олоҕун суола оннук салаллар.
Ааһан эрэр сылга төрөөбүт оҕолор ортолоругар Арассыыйа үрдүнэн киэҥник биллэр ааттаахтар элбэхтэр. Ол курдук, Виктория, Алиса, Милана, Ева, София диэн кэрэчээн кыргыттарынан, Александр, Артем, Тимур, Максим, Марк, Лев диэн ааттаах уолаттарынан Саха сирэ элбээтэ.
Кыргыттарга Георгина, Астра, Пелагея, Рита, Федора, Феодосия, Хаарчаана, Июлина, уолаттарга Авдей, Бронислав, Венсислав, Леонтий, Якутск, Мир диэн сэдэх ааттар эбилиннилэр.
Саҥа төрөөбүт оҕолорго кыргыттартан 19 %-ра, уолаттартан 23 %-ра сахалыы ааттаммыт. Бу, уруккуга тэҥнээтэххэ, олох аҕыйах. Хата, Америкаҕа олорор биир дойдулаахпыт, модель Полина Протодьяконова игирэ уолаттарын сахалыы ааттаан бар дьону соһуппута да, үөрдүбүтэ да.
Саҥа төрөөбүт оҕолор эрэ буолбакка, улахан дьон эмиэ ааттарын уларыталлар. Оннук көстүү балачча элбэх. Ол курдук, 1597 киһи ийэтэ, аҕата биэрбит аатыттан аккаастанан, бэйэтэ баҕарар аатын иҥэриннэ.
Бэйэ кэр.
Хаартыска: Cахалайф.ру