“Госстройжилнадзор” Саха сиринээҕи салаатыгар Дьокуускай к. Рыдзинскай уулуссатын 18/9 №-дээх дьиэтигэр олорор дьахтар суунар хоһугар соттор куурдара алдьаммытын туһунан суруйбут. Кини ону оҥоттороору «Бюджетник» диэн управляющай хампаанньатыгар сайаапка биэрбит эбит. Онуоха кинилэр “Биһиги сылытар тэрили оҥорбоппут, бэйэҥ бас билииҥ” диэн аккаастыы турбуттар.
Хонтуруоллуур уорган, киирбит үҥсүүнү үөрэтээри, кыбартыыраҕа тиийэн соттор куурдары көрбүт уонна тэстэн дьэбиҥҥэ сиэппитин, куһаҕаннык туттарыллыбытын, хамсыы сылдьарын быһаарбыт. Сүрүнэ, соттор куурдар тэрил элбэх кыбартыыралаах дьиэни сылытар уопсай систиэмэҕэ холбонон турара биллибит. Онон, соттор куурдар тэрил управляющай хампаанньа эппиэттиир тэрилин ахсааныгар киирэрэ бигэргэммит.
Бэрэбиэркэ түмүгүнэн «Бюджетник» управляющай компания сылааска холбуур үлэ саҕаланыан иннинэ үҥсүбүт дьахтар кыбартыыратыгар саҥа соттор куурдары туруоран биэрбит.
Сонун төрдө: “Госстройжилнадзор” Саха сиринээҕи салаатын пресс-сулууспата