Аҕыйах хонуктааҕыта 63 саастаах биир дойдулаахпыт Ханты-Мансийскай автономнай уокурук Сургут куоратыттан Саха сиригэр сатыы кэлэн иһэрин туһунан сонун тарҕаммыта. Кини устуоруйатын үтүө санаалаах Владимир ЗАЯЦ диэн киһи бэйэтин ВКонтакте ситимигэр суруйбутун Сургут сүрүн таһаарыыта сырдаппыт этэ.
Владимир кэпсээниттэн, биир дойдулаахпыт Александр Спиридонович диэн ааттааҕа, баахтанан тутууга үлэлии тиийэн баран албыннатан, үлэлээбит хамнаһын кыайан ылбакка сылдьара, пааспарын былдьаппыта биллибитэ. Владимир Александры хостелга илдьэн, аһаппыт, сууннарбыт уонна салгыы атаарбыт. Кини айанньыт дойдутун Өлөөн диэн суруйбут этэ, ол эрээри Өлөөн баһылыгын социальнай боппуруостарга солбуйааччыта Туйаара Павлова маны бигэргэппэтэҕэ: « Сонун тарҕанаатын кытары, чахчы Өлөөн киһитэ дуу, суох дуу диэн быһаарсан саҕалаабыппыт. Онтубут түмүгэ суох буолбута. Онон, атын улуус киһитэ эбит, сыыһа суруллубут эбэтэр көспүтэ ырааппыт буолуон сөп диэн түмүккэ кэлбиппит».
Сонун тарҕанаатын кытары, Саха сиригэр биир дойдулаахпыт кимин, ханна тиийбитин быһаарар үлэ саҕаламмыта, кинини кыраныыссаҕа тохтообут сиригэр тоһуйан ыларга бары бэлэмнэр. Арассыыйа силиэстийэлиир кэмитиэтин бэрэссэдээтэлэ Александр Бастрыкин Ханты-Мансийскай автономнай уокурук – Югра силиэстийэлиир управлениетын салайааччытыгар бу дьыаланы түргэнник үөрэтэргэ уонна миэрэлэри ыларга сорудахтаабыта.
Саха сирин суруналыыстара сатыы айанньыты булан кэпсэтэ сылдьыбыттарын түмүгэр, билигин элбэх билиннэ. Ол курдук, кини араспаанньата - Павлов. Красноярскай кыраайга эһэлээх эбэтигэр иитиллибитим, ол эрээри Бүлүү улууһун Чочу нэһилиэгэр олоробун диэн этиммит (хаһан, тоҕо онно тиийбитэ биллибэт). Алтынньы 22 күнүнээҕи туругунан, Александры Чита суолуттан Воронеж суоппара, аһыныгас санаалаах Илья СОТНИКОВ олордубут уонна Сковородиноҕа диэри илдьиэх буолбут. Мантан «Лена» федеральнай суол саҕаланар.
“ТайгаПост” кэрэспэдьиэнэ Александр Спиридоновичка эрийэн тиийбит. Онуоха, кини “Ленаны туоруур суол син биир сабыылаах, онон Тындаҕа эбэтэр Саха сирин соҕурууҥҥу өттүгэр суол тутуутугар үлэлии хаалыам этэ” диэбит. Кэрэспэдьиэн токкоолоһон билбитинэн, кини 1981-1984 сс. Афганистаҥҥа старшинанан сулууспалаабыт. Бойобуой Кыһыл Знамя уордьанынан наҕараадаламмыт. Кырыктаах киирсиилэртэн түөрт төгүл суос-соҕотоҕун тыыннаах ордон таҥнарыыга уорбаланан, ыстарааптыыр чааска ыытыллыбыт. Онон, Алесандр Павлов икки сыллаах сулууспата түөрт сылга диэри уһаабыт.
Сонун төрдө: ТайгаПост