Айсен Николаеа миниистирдэр кэбиниэттэрин, өрөспүүбүлүкэ Ил Дарханын уонна бырабыыталыстыбатын дьаһалтатын салайааччыларын кытта мунньахха нэдиэлэтээҕи соруктары туруорда. Ол быыһыгар, байыаннай сулууспаҕа сылдьааччылар дьиэ кэргэннэригэр социальнай көмө оҥоруу уонна федеральнай бырагыраамаларга кыттыы туһунан сыалы-соругу туруорда.
«Өрөспүүбүлүкэҕэ номнуо байыаннай сулууспаны бара сылдьааччылар дьиэ кэргэннэригэр көмөнү оҥоруу туһунан быһаарыылар ылылыннылар. Бу дьайыыны бытаардыбаккытыгар уонна түргэнник туох баар көмөнү оҥороргутугар көрдөһөбүн, маныаха, өрөспүүбүлүкэ бүддьүөтүттэн үп көрүллүбүтэ. Маны таһынан, Саха сирин уолаттара тиийбит байыаннай чаастарын кытта систиэмнэйдик алтыһыыга, кинилэргэ миэстэлэригэр булгуччу наадалаах көмөнү оҥорууга ордук чуолаан болҕомтоҕутун уураргытын көрдөһөбүн», - диэн СӨ Ил Дархана этэр.
Маны таһынан, өрөспүүбүлүкэбит Ил Дархана эппитинэн, федеральнай таһымҥа урбаан эйгэтигэр административнай ноҕурууска аччаан иһэр уонна эрэгийиэҥҥэ бу быһаарыы олоххо киириитин хонтуруолга ылалларын курдук сорудахтаата. Ол курдук, РФ Бырабыыталыстыбата 2023 сылга урбаан улахан аҥаарын чааһын былааннаммыт бэрэбиэркэттэн босхолоото. Аныгыс сылга олус үрдүк уонна үрдүк куттал үөдүйүөн сөп таһымнаах тэрилтэлэргэ былааннаммыт бэрэбиэркэлэри ыытыахтара.
Ону сэргэ, бу күннэргэ Арктика эрэгийиэннэрин «Биир кэлим субсидия» диэн мэхэниисимҥэ киллэрии туһунан быһаарыыны ыллылар. Эрдэ манна Уһук Илин эрэгийиэннэрэ киирэр этилэр. Бу Арктикаҕа социальнай уонна инженернэй инфраструктураны киллэрии тэтимин күүһүрдэн биэриэҕэ. Айсен Николаев бу бырагыраамаҕа Саха сирин арктическай оройуоннарын киллэрэр туһунан этиилэри бэлэмнииргэ эмиэ сорудахтаата.