Саха Өрөспүүбүлүкэтин Ил Дархана Айсен Николаев кэлэр үс сыл иһигэр тыа хаһаайыстыбатын сайдыытыгар ордук суолталаах хайысхалары быһаарда. Маны олоххо киллэрии былааннара миниистирдэр кабыныаттарын чилиэннэрин уонна норуодунай дьокутааттар сүбэ мунньахтарыгар этилиннэ.
Ил Дархан 2022 с., былааннары олоххо киллэрэр 2023 уонна 2024 сылларыгар «Тыа хаһаайыстыбатын сайдыыта уонна 2020-2024 сылларга тыа хаһаайыстыбатын бородууксуйатын, сырьены уонна аһы-үөлү хонтуруоллааһын» диэн судаарыстыбаннай бырагыраамманы бырабыыталыстыбаҕа үбүлүүрүгэр дьаһайда.
2022 сылга өрөспүүбүлүкэ бүддьүөтүн оҥоруутун чэрчитинэн, оҥорон таһаарар агрокомплекс эбийиэктэрин тутууга, саҥардыыга уонна уларытан тутууга үбү көрүүнү, «Туймаада» ФАПК устаабын хапытаалын үрдэтиини бырабыыталыстыба эрдэттэн көрүөхтээх.
«Өрөспүүбүлүкэҕэ бааһынай хаһаайыстыбалары элбэтэр туһуттан улахан инвестбырагыраамма баар буолара ирдэнэр. Улахан хотоннору, бурдук ыскылааттарын, сылгы баазаларын тутуу булгуччулаах. Куруутун, чопчу производствонан дьарыктанааччылар уонна сиргэ үлэлээччилэр харахтарынан көрөр ордук», - диэн Ил Дархан эттэ.
Саха өрөспүүбүлүкэтин тойоно сылгыһыттарга субсидияны анааччылар өйөбүллэрин үтүө холобурунан ааттаата.
«Бу өйөбүл баар буолан, түмүккэ, фермердэр сылгыларын элбэттилэр, көрүллэр харчы 2012 сыллааҕы таһымынан хаалбыт да буоллар, төбө ахсаана аҕыйаабат. Бу - дьон бэйэлэрин оннуларын булан этэҥҥэ үлэлии сылдьалларын туоһулуур. Маннык үлэ мэхэниисимнэрин салгыы тобулан олоххо киллэрэн иһиэххэ наада», - диэн Айсен Николаев эттэ уонна бырабыытыластыбаҕа сылгы хаһаайыстыбаларыгар төрүөх элбиирин туһугар өйөбүл хайысхатын элбэтэллэригэр модьуйда.
Маны таһынан, Айсен Николаев тыа баһаардарыгар эмсэҕэлээбит сылгы хаһаайыстыбаларыгар 2022 сыллаах бүддьүөттэн өйөбүлү оҥорууну көрөргө диэн быһаарда.
«Тыа хаһаайыстыбата – дьон бэйэтин хааччыныытын уонна эрэгийиэн продовольственнай куттала суох буолуутун көрдөрөр салаа. Биһиги ыйааҕынан уонна бүддьүөт бырайыагынан олоҕурбут тэрээһиннэр олоххо киириэхтээхтэрин өйдүөх тустаахпыт, оччоҕуна эрэ тыа хаһаайыстыбатынан дьарыктанааччылар бэйэлэрин дьайыыларын сөпкө былааннаныахтара. Маннык суоттаныы уһун болдьоххо бэлэмнэниллэр, тоҕо диэтэргит, тыа хаһаайыстыбата – уһун болдьоххо былааннаныллар салаа», - диэн Ил Дархан түмүктээтэ.
«Саха Өрөспүүбүлүкэтигэр тыа хаһаайыстыбата сайдыытын стратегическэй хайысхаларын туһунан» 2018 с. ахсынньы ыйдааҕы ыйааҕа 2024 с. диэри бу салаа сайдыытын улахан суолталаах соругунан ааҕар. Онуоха диэри олохтоох оҥорон таһаарыы бородууксуйаларынан нэһилиэнньэни хааччыйыы оҥоһуллуохтаах: бу иһигэр үүтү уонна үүт бородуукталарын - 61 % диэри, эти уонна эт бородуукталарын – 30 % диэри, хортуоппуйу – 66 % диэри, оҕуруот астарын – 51 % диэри, сымыыты – 65 % диэри.
СӨ Ил Дарханын уонна Бырабыыталыстыбатын пресс-сулууспата.
Андрей Сорокин хаартыскаҕа түһэриилэрэ.
