1992 сыл тохсунньу 19 күнүгэр Саха Өрөспүүбүлүкэтин Бэрэсидьиэнин ыйааҕынан Тас сибээс министиэристибэтэ тэриллибитэ.

Бу 20 сыл устата норуоттар икки ардыларынааҕы уонна тас экэнэмиичэскэй сыһыаны сааһылыыр нуорма-быраап базата оҥоһулунна, үрдүк таһымнаах үлэһиттэр бэлэмнэннилэр, тэрээһин үлэтэ чопчуланна. Күн бүгүн Саха сирэ ХНТ үөрэххэ, билимҥэ уонна култуураҕа тэрилтэтин (ЮНЕСКО), хотугу дойдулар күбүрүнээтэрдэрин «Хотугу форумун» кытары үлэлиир, атын сирдэргэ олорор биир дойдулаахтарбытын кытта быстыспат ситими тутар, араас аахсыйаҕа тиһигин быспакка кыттар.

Саха сирин саамай бөдөҥ аан дойдутааҕы бырайыагын – «Азия оҕолоро» спорт оонньуутун – Арассыыйа Бырабыыталыстыбата, Аан дойдутааҕы Олимпийскай кэмитиэт уонна Азиятааҕы Олимпийскай сэбиэт өйүүллэр.

Саха сирин Тас сибээһин 20 сылыгар аналлаах тэрээһиннэр Дьокуускайга олунньу 3-4 кк. ыытыллыахтара. СӨ Федеративнай сыһыаҥҥа уонна тас сибээскэ министиэристибэтин мунньаҕар РФ Омук дьыалаларыгар министиэристибэтэ (МИД), бырабыыталыстыба чилиэннэрэ, тас сибээс үлэһиттэрэ, уопсастыбаннай тэрилтэлэр кыттыахтара. Ити кэмҥэ улахан кылаас оҕолоругар сыл ахсын ыытыллар «Будущий дипломат» куонкурус түмүгэ тахсыа. ХИФУ устудьуоннара МИД бэрэстэбиитэллэрин лиэксийэлэрин истиэхтэрэ.

Олунньу 8 күнүгэр Москубаҕа баар МИД дьиэтигэр Саха сирин билиһиннэрии буолуо. Манна атын дойдулар дипломаттара кыттыахтара.