Тохсунньу 24 күнүгэр Саха тыйаатырыгар С.С. Яковлев-Эрилик Эристиин төрөөбүтэ 120 сылыгар аналлаах тэрээһин буолла.

Бу киэһэ уус-уран самодеятельность кыттыылаахтара Эрилик Эристиин «Буура Дохсун» олоҥхотун көрдөрдүлэр. Суруйааччы кинигэлэрин, ыстатыйаларын быыстапката, кини түмэлин (музей) экспозицията турда. «Саха» НКИХ «Маарыкчаан» устуудьуйатын киинэтэ көһүннэ. Эрилик Эристиин олоҕун уонна айар үлэтин туһунан филология билимин дуоктара, бэрэпиэссэр Дора Васильева кэпсээтэ.

Семен Степанович Яковлев-Эрилик Эристиин 1892 с. тохсунньу 24 күнүгэр төрөөбүтэ, 1942 с. алтынньы 6 күнүгэр өлбүтэ. Гражданскай сэрии кэмигэр кыһыл бартыһаан этэ. 1924 сылтан – ССКП, 1938 сылтан – ССРС Суруйааччыларын сойууһун чилиэнэ. Айымньылара 1923 сылтан ыла бэчээттэнэн барбыта. 1928 с. «Чолбон» сурунаалга «Соһуччу үөрүү» диэн бастакы сэһэнэ тахсыбыта. 1931-42 сс. «Бассабыык Тиихээн», «Тулаайах Уйбаанчык» поэмалары, «Революция уолаттара», «Аймалҕан» сэһэннэри айбыта. 1942 с., хараҕа суох буолан баран, саха литэрэтиирэтигэр «Маарыкчаан ыччаттара» бастакы арамааны түмүктээбитэ.

Саха сирин Суруйааччыларын сойууһа уонна Эрилик Эристиин аатын сүгэр сопхуос тыа сирин сырдатар айымньыларга литэрэтиирэ бириэмийэтин олохтообуттара. Төрөөбүт дойдутугар – Чурапчы Чакырыгар – Эрилик Эристиин түмэл-дьиэтэ үлэлиир.