Дьокуускайдааҕы национальнай гимназия мунньахтыыр саалатыгар Ил Түмэн дьокутаата, дойду бэрэсидьиэнигэр хандьыдаат В.В. Путин Саха сиринээҕи ыстаабын салайааччыларыттан биирдэстэрэ Владимир Членовы кытта көрсүһүү буолан ааста (санаттахха, В.Членовы кытта бу ыстаабы Егор Жирков салайсар).

В.Членов көрсүһүүгэ: “В.Путин Норуодунай фронт аатыттан барар. Өскөтүн билигин быыбар буолара буоллар, туох да саарбахтааһына суох биһиги хандьыдааппыт быһа барыллаан 42 кэриҥэ %-ны ылан кыайыа этэ.

Ол биллэр. Биллэрин курдук дойду бэрэсидьиэнин дуоһунаһыгар хандьыдааттар баартыйалар ааттарыттан тураллар. “Биир ньыгыл Арассыыйа” баартыйа В.В. Путины өйүүллэрин биллэрбиттэрэ. Онон бу баартыйалар киирсиилэрэ буолуоҕа. Оттон кэлэр быыбардар кырдьыктаахтык уонна дьэҥкэтик ааһалларын туһугар үгүс үлэ ыытыллар. Быыбардыыр сирдэргэ дьэҥкир ууруналар, веб-хаамыралар туруохтара.

Бэрт соторутааҕыта “Известие” хаһыакка дойду бырабыыталыстыбатын бэрэссэдээтэлин ыстатыйата тахсан турар. Аны бэҕэһээ култуура туһунан суруйуута тахсыбыта. Маннык хабааннаах ыстатыйалар салгыы ситимин быспакка тахсыахтара. Итинник ньыманан быыбар иннинээҕи бырагыраама оҥоһуллар диэххэ сөп” – диэн кэпсээтэ.