Вьетнам социалистическай өрөспүүбүлүкэтин дэлэгээссийэтэ Саха сиригэр сырыытын кэмигэр СӨ Эргиэн-бырамыысылыннас палаатата уонна Вьетнам-Арассыыйа хардары үлэлэһиитин кэмитиэтэ урбаан бырайыактарын олоххо киллэрэн доҕордуу сыһыаны кэҥэтэр туһунан Боротокуолга илии баттаатылар.
Дэлэгээссийэ Дьокуускайга «Sciberia», «Сайбиэм», «Саха Таас», «ЯкутОптТорг», хампаанньалары кытта көрүстэ, маны таһынан «Киэргэ» уонна «Айгуль» курдук кэккэ хампаанньаларга сырытта. Хардары үлэлэһиини кэҥэтэр соруктары СӨ Инбэстииссийэлэри тардар уонна экспорды өйүүр ааҕыныстыбатыгар, СӨ Экспорды өйүүр киинигэр, СӨ Эргиэн-бырамыысылыннас палаататыгар, М. К. Аммосов аатынан ХИФУ-га дьүүллэстилэр.
Ву Кхак Нгуен салайааччылаах Вьетнам дэлэгээссийэтэ Саха сиригэр кэлэн барыытын СӨ Тас сыһыаҥҥа уонна дьыалаларга министиэристибэтэ тэрийдэ. Дэлэгээссийэни Вьетнам-Арассыыйа доҕордоһуутун уопсастыбатын вице-бэрэсидьиэнэ Регина Бударина арыаллаата.
2022 сылга Саха сирэ Вьетнамы кытта табаарынан эргиниитэ АХШ 53 мөл. дуолларга тэҥнэстэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата