Атырдьах ыйын 25 күнүгэр киэһэ Өрөспүүбүлүкэтээҕи быыһыыр сулууспа дьуһуурунайын төлөпүөнүгэр Мииринэй к. Заречнай түөлбэтин уулаах хранилищетыгар балыксыттардаах оҥочо түҥнэстибитин туһунан иһитиннэрии киирбит. Ол түмүгэр икки эр киһи ууга түспүт. Олортон биирдэстэрэ, 1986 с. төрүөх эр киһи, кыайан тахсыбакка суорума суолламмыт.
Быһылаан буолбут сиригэр СӨ Быыһыыр сулууспатын Ньурбатааҕы көрдүүр-быыһыыр этэрээтэ тиийэн үлэлээтэ. Уу түгэҕин гидролокаторынан көрөн, тимирбит киһи өлүгүн булан таһаардылар. Кини быыһыыр сэлиэтэ суох айаннаабыта билиннэ.
Онон, быыһааччылар Саха сирин олохтоохторун, уунан айанныыр түгэҥҥитигэр, быыһыыр сэлиэт кэтэргитин уонна уһуллан хаалбатын курдук туттараргытын умнумаҥ диэн сэрэтэллэр.
Маҕаһыыҥҥа улахан киһини быыһыыр сэлиэт 1000-1500 солк., оҕо киэнэ 600-900 солк. сыаналаах диэн суруйаллар.
Сонун төрдө: СӨ Быыһыыр сулууспата