Хамнас үрдээтэ
02_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copyБэрт соторутааҥҥа диэри Саха сиринээҕи бүддьүөт эйгэтигэр үлэлиир 13 800-чэ киһи тииһинэн олоруу алын кээмэйиттэн (прожиточный минимум) кыра хамнаһы аахсаллара. 2014 сыл т...
Биэнсийэ туһунан
74_copy_copy_copy_copy_copy_copyКэнники сүүрбэ сыл устата дойдубут экэниэмикэтэ сатаан сааһыламматаҕын түмүгэр, киһи күннээҕи аһыгар-таҥаһыгар тиийэр биэнсийэ тиһигэ эмиэ кыайан оҥоһуллубата. Ол иһин, би...
Сүрүн сирэй Сонуннар "Мандар ааҕыыларын" түмүктэриттэн

Сонуннар

Олунньу 13 күнэ – Төрөөбүт тыл уонна сурук-бичик күнэ!
28-12-2015 17-08 | Көрдүлэр: 2845
Төрөөбүт тыл уонна сурук-бичик күнүн көрсө, олунньу 13 күнүттэн 21 күнүгэр диэри Саха сирин тө...
Саҥа сокуон инбэлииттэри көмүскүө
28-12-2015 16-54 | Көрдүлэр: 2705
Ил Түмэн ХХ уочараттаах пленарнай мунньаҕар дьокутааттар А.Корякин уонна А.Атласова инбэлиит д...
Максим Аммосов сырдык кэриэһигэр
28-12-2015 16-37 | Көрдүлэр: 2583
“Ахсынньы 22 күнэ – саха норуотун устуоруйатыгар бэлиэ күн. Бу күн, 1897 сыллаахха саха судаар...
Тупсарыы сыл
28-12-2015 16-31 | Көрдүлэр: 5167
2016 сылы Саха Өрөспүүбүлүкэтигэр «Нэһилиэнньэлээх пууннары тупсарыы сылынан биллэрэр туһунан”...
"Мандар ааҕыыларын" түмүктэриттэн
21-12-2015 17-38 | Көрдүлэр: 2682
Кэмпириэнсийэ пленарнай мунньаҕар тыл эппит салалта, учуонай эйгэ ытык дьоно, ыалдьыттар бука ...
Кыайыыны уhансыбыттар
12-11-2015 17-53 | Көрдүлэр: 2622
"КЫЫМ" норуот хаhыата уонна "Будь в курсе" информационнай мобильнай сыһыарыы көҕүлээһиннэр...
ИЯКН дириэктэрэ Г.Г.Торотоев
12-11-2015 17-48 | Көрдүлэр: 2762
М.К.Аммосов аатынан ХИФУ РФ хотугу норуоттарын тылларын уонна култууратын µ³рэтэр Институуту...
Сир сокуонун тула
12-11-2015 17-47 | Көрдүлэр: 3485
Сэтинньи 3 кµнµгэр Сунтаар Устьетыгар улуус Нэ´илиэктэрин ба´ылыктарын сэбиэтэ мустан, 2016 сы...
Тэрилтэлэр, урбаанньыттар бол±ойу²
12-11-2015 17-36 | Көрдүлэр: 1736
Нолуогу судургутуллубут систиэмэнэн (упрощенная система налогооблажения) т³лµ³н ба±арар, ол гы...
Ас-үөл сыанатынан үһүс миэстэлээхпит
08-10-2015 15-36 | Көрдүлэр: 2030
Тыыннаах сылдьарга сиэнэрэ булгуччулаах ыйдааҕы ас дьоҕус нобуора диэн өйдөбүл баар. Нууччалыы...
Петр Наумовы – “Я – гражданин” аакка!
08-10-2015 15-33 | Көрдүлэр: 1877
Хараҕынан бастакы курууппалаах инбэлиит, 65-с хаарын санныгар түһэрбит, Кыайыы 70 сылыгар анаа...
Муостабыт дьылҕата – Кытай инвестордарын илиитигэр?
08-10-2015 15-32 | Көрдүлэр: 1870
Өлүөнэни туоруур муоста дьэндэйэрин кэтэһээччи элбэх. Соторутааҕыта Санкт-Петербурга Росавтодо...
Сочига Арктиканы кэпсэтэллэр
08-10-2015 15-20 | Көрдүлэр: 1878
Сочига, бу дьыл алтынньы 5 к., Арктиканы сайыннарыы боппуруоһунан дьарыктанар судаарыстыба хам...
Өссө 10 оскуола
03-09-2015 20-11 | Көрдүлэр: 1931
СӨ Үөрэххэ министиэристибэтин тиһэх чахчыларыттан көрдөххө, күн бүгүн өрөспүбүлүкэ үрдүнэн уоп...
“Сибиир күүһэ” бигэргэннэ
03-09-2015 20-03 | Көрдүлэр: 1868
Бу күннэргэ премьер Д.Медведев “илин диэки” тардыллар гаас ситимин (ол иһигэр “Сибиир күүһүн”)...
* Бесплатно для абонентов СТК по всей РС(Я), (кроме ТП "Фристайл")

"Мандар ааҕыыларын" түмүктэриттэн

21.12.2015 17:38 | Автор: Admin | Көрдүлэр: 2681   
Печать
mandarКэмпириэнсийэ пленарнай мунньаҕар тыл эппит салалта, учуонай эйгэ ытык дьоно, ыалдьыттар бука бары өрө күүрэн, санаалара кэлэн, көтөҕүллэн туран киһи эрэ сэҥээрэр, ылынар гына уратытык аһыллан саҥардылар. Оҕолор букатын ууну ыймахтыыр, салгыны эҕирийэр курдук турукка олорон иһиттилэр. Итини истэн олорон киһи Мандар Уус ийэ тыл иччитин илдьэ сылдьар буолан, кини алгыһа тиийэн дьон бары арылыннылар дии саныыр.

Маннык мунньахтарга оҕо болҕомтотун итинник ыбылы тардан ылбыты киһи өтөрүнэн өйдөөбөт. Онон чахчы да талааннаах лектордар үнүбэрсиэккэ үлэлииллэр эбит диэн оскуола оҕолоро итэҕэйэн бардахтара, идэҕэ тардыыны инньэ гынан чахчы көдьүүстээхтик алтыһыннардыбыт. Кимнээх итинник ылыннарыылаахтык эттилэр-тыыннылар диир буоллахха, проректор Федоров Михаил Прокопьевич үөрэх ситимигэр норуот култууратын сыһыарар кэскилин, Таатта улууһун Баһылыгын солбуйааччыта Сивцева Изабелла Александровна Мандар Уус үлэтин сүнньэ тоҕус чуолҕаҥҥа түмүллэн аныгы үөрэх ыстандаартын бүүс бүтүннүү хабарын итэҕэттилэр. Салгыы учуонайдар Маастар дьарыгын араҥаларын саас-сааһынан арыйтаан көрдөрдүлэр. Үнүстүүт саҥа дириэктэрэ Гаврил Григорьевич Торотоев Мандар уус тойоннооһунун уратытын чинчийбититтэн кэпсээтэ, этнограф Слепцов Платон Алексеевич сахаҕа тимир култуурата төрдүттэн баарын бигэргэттэ, оттон Уустар Ассоциацияларын бэрэсидьиэнэ Бурцев Николай Николаевич уус диэн айар киһи буоларын ыйан туран, идэтин толору баһылаабыт киһи бөлүһүөк таһымыгар тахсар, Мандар Уус оннук киһи буолар диэтэ, үөрэхпит ситимэ сыыһа буолан оҕолор идэлэрин талбакка кэлэллэригэр, Уһуйаантан кэлбит оҕо быдан бэлэмнээх буоларыгар тохтоото. Онтон салгыы бөлүһүөктэр тыл ыллылар. Андрей Саввич Саввинов Мандар үөрэҕин үс тирэҕин ыйан туран сүнньэ олоҥхо диэтэ уонна бу үөрэх олоххо киирдэр киһитийиэ этибит диэн эрэл санаалааҕын иһитиннэрдэ. Виктор Данилович Михайлов эмиэ идэни баһылааһыны өрө тутар сөбүн, үрдүк үөрэх ону быһа түһэн кэбиһэн күлүкүчүтэн, утарыта иккини эрэ баардылааһыҥҥа охторор диэн туран Мандар үөрэҕэр күрүөлэнии, үскэ тирэнии баар, билии көрүүлээх эрэ буоллаҕына көдьүүстээх диэтэ. Мандар Уус киириэҕиттэн Духуобунас Акадьыамыйатын үлэтин тосхоло, хайысхата дьэҥкэрбитин ыйда. Тыл билимин дуоктара Людмила Степановна Ефимова иитиллэн тахсыбыт эйгэм Мандар Кыһата, итэҕэл кэмпириэнсийэлэригэр кинини батыһа сылдьан истэр этим диэн билиннэ. Икки үйэ улуу киһитэ диэн сыаналыыбын диэн туран Баайаҕыын тылыгар бэйэтин ырыатын ыллаата. Семиотика өттүттэн көрүүгэ диэн туран Ким Дмитриевич Дьячковскай-Анаарар Мандар Ууска анаабыт хоһооно "Наш университет" хаһыакка бу күн тахсыбыт хоһоонун аахта, ол айымньытыгар билим тиэриминнэрин сахалыы тылбаастаабытын ыйыталаата. Галина Семеновна Попова-Санаайа "Мандар кыһатын" төрүттэрин ырыҥалаан билим таһымыгар көрбүтүн билиһиннэрдэ, Уһуйуу - Үөрэтии - Такайыы ситимигэр киирэн нэһилиэк ахсын Уус Дьиэлэнэр соруктаныаҕыҥ диэтэ.

 

"Мандар кыһатын" үлэтин уопутун тарҕаппыт холобурун Мэҥэ-Хаҥалас Дьаҥхаады нэһилиэгиттэн Холмогорова Анна Андреевна уонна тимир ууһа Федот Николаевич Максимов кэпсээтилэр. Оҕону үөрэттэххэ уус буолар, оҥостубут быһахтарын уолаттар харахтара чаҕылыйа туппахтаа да туппахтаа буолаллар, сиэннэрбэр тириэрдиэм дииллэр диэн иэйэ эттилэр. Баайаҕа оскуолатын учуутала, Мандары нууччалыы тылбаастаабыт Ольга Николаевна Макарова кини киһилии килбиэнин, ойуу суолун сонордообут, айыы суолун аартыгын арыйбыт олоҕун оҕо эрдэҕиттэн билэрин долгуйан даҕаны, долгутан даҕаны туран итийэн-кутуйан кэпсээтэ. Түмүккэ Мандар Уус оҕолорго, ыччакка туһаайан кэс тылын эттэ. Киһи - Кут-Сүр - Олох - Аат - Кэм - Тыл - Санаа - Доҕор - Таптал - Кэрэ - Саха тыла диэн утуму батыһа сэһэргээн, Айыы киһини олоҕу алҕаатын диэн бэйэтин үлэтин салҕата сиргэ ыыппытын эттэ. Оттон ити иннинэ Мандар Ууһу бэйэтин А.С. Саввинов: "Букатын түҥ былыргы киһини манна сиргэ Айыылар ыыппыттар - айыы сирэйдээх абааһылар аһары элбээн барбыттарыгар", - диэн Алампаҕа олоҕуран эппитэ кэмпириэнсийэбит бастакы аҥаарын сэһэнин ситимнээн, күрүөлээн, төгүрүтэн кэбистэ.

Аҕыс хайысханан бөлөхтөһөн күнүстэн киэһэ үлэ күөстүү оргуйда, ону кэрийэн көрөргө кэпсээччи даҕаны, истээччи даҕаны сүр-кутунан бүтүннүү ылларан кыттара киһи сүргэтин көтөхтө, чахчы туох эрэ уһулуччу суолталааҕы, кэмигэр таба тайанан оҥорон эрэбит дуу диэн сык гынан ылыталаатыбыт. Маастар бэйэтэ маны кэрийэн көрдө-иһиттэ, бука туох эрэ диэн хаппарыгар хатаатаҕа буолуо, оттон бу күҥҥэ тылын баһа өрүү буоларын курдук: "Наһаа үчүгэй!" - диэнтэн уларыйбата.

Мандар Ууһу киһи быһыытынан көрөн кини норуокка оруолун, чөл олоҕу тутуһарга туһаайыытын ырытар бастакы секцияҕа 14 дакылааты истэн Таатта лицейин учуутала Андросова Оксана Прокопьевна "Ытык Таатта" диэн бырайыагын бастыҥынан билиннилэр. ГЧИ научнай сотруднига, ф.н.к. Оросина Надежда Анатольевна (соавтора Мухоплева С.Д.) Мандар уус Баайаҕа фольклорун тута сылдьан салгыыр киһи буоларын дакаастаан иккис истиэпэннээх дипломант буолла. "Айыы кыһатын" сэттис кылааһын үөрэнээччилэрэ Стручков Вадим, Эверстов Аркадий (салайааччылара Каженкин Р.Н.) Мандар Уус Аан дойду таһымнаах киһи буоларын көрдөрөн үһүс миэстэни ыллылар. Манна быһааран этиэх тустаахпыт - учуонайы, учууталы кытта оҕону хайдах тэҥнээбит баҕайыларай диэхтэрин сөп. Билим кэмпириэнсийэтигэр киһини киһиэхэ тэҥнэммэт, этиллэр санаа, үлэ саҥа өрүтэ, саҥаны арыйыы, үлэ олоххо туһата көрүллэр, онон маннык киэҥ араҥаны хабан тэрийиллэр. Маны таһынан, тыл этээччи бэйэтин санаатын толору холкутук үлүһүйэн туран кэпсиирэ, биллэн турар, сыанаһыты даҕаны абылыыра ханна барыай. Ийэ тыллаах, ийэ өйдөөх, ийэ кута толору киһи кэпсиирэ-ипсиирэ арыйыы, арыллыы буолара баар - ол Мандар Уус бэйэтин холобуругар илэ көстөр.

Иккис секция "Мандар кыһата" оскуола саха үгэстэрин көлүөнэттэн көлүөнэҕэ туттарар сатабылын арыйар сыаллаах үлэлээтэ. 14 үлэттэн бастыҥынан Майа гуманитарнай гимназиятын учууталын Дорҕоон Дохсун Ворогушин уол оҕону иитии кыһаларын туһунан үлэтэ ааҕылынна. Иккис истиэпэннээх диплому ХИНТКҮ культурологияҕа салаатын 4-с кууруһун устудьуона Егор Протопопов (салайааччы Попова Г.С.) "Этноспортан төрүт култуураҕа" диэн бырайыагынан ылла. Оттон үһүскэ Дорҕоон Дохсун салайар оҕото, сэттис кылааска үөрэнэр Адамов Айсиэн "Тэгин" диэн уолаттар түмсүүлэрин үлэтин сырдатан таҕыста.

Үһүс бөлөххө тоҕус киһи тимир култууратын тилиннэриигэ санааларын, ситиһиилэрин сырдаттылар. Онно "Саха култууратыгар ууска сыһыаннаах сиэрдээх билиини ыччакка тириэрдии" диэн дакылаатынан ХИНТКҮ 3 кууруһун устудьуона Ариадна Потапова (салайааччыта Никитина Н.Г.) бастаата. Эмиэ Дорҕоон Дохсун салайар оҕото Данилов Аман тимири уһаарыы туһунан кэпсээн иккис буолла. Оттон "Айыы кыһатын" 10 кылааһыттан Пестерев Дьулус (салайааччылара Дьяконова М.Н., Тимофеева С.Д.) саха быһаҕын оҥоруу технологиятын үөрэтэн үһүс истиэпэннээх дипломант аатын ылан кынаттанна.

Мандар Уус бөлүһүөктүү көрүүлэрин, ойууларын, итэҕэли үөрэтэр хайысхатын чинчийиигэ 20 дакылааты иһиттилэр. Бу төрдүс секцияҕа бастакы Ефремов Ньургун (салайааччыта Бурнашева В.В.) буолла, Прохоров Айгылаан (салайааччыта Севастьянова Н.В.) глобализация усулуобуйатыгар ийэ тыл суолтатын Мандар Уус ойууларын философиятыгар анааран көрөн иккис дэннэ. Готовцев Семен, Заморщиков Павел (салайааччылара Чиряев А.К.) иккиэн Дьокуускай к. 12-с №-дээх оскуолатыттан кыттан ойуу тылын суолтатын арыйан үһүс истиэпэннээх дипломаннар.

Ойуу-дьарҕаа эйгэтигэр анаарыыларга 15 үлэттэн бастыҥынан Үөһээ Бүлүү гимназиятын үөрэнээччитэ Филиппов Анатолий (салайааччыта Неустроев Ф.Ф.) сахалыы ойууну-бичиги, ойуу тылын дьиэ тас көстүүтүн киэргэтиигэ туһаныы инники кэскилин көрөн, ону тэҥэ оҥоһуктаах кэлэн аатырда. Христофорова Альбина иккис истиэпэннээх диплому тутта. Оттон магистрант Ноговицына Алла Наумовна (салайааччы Торотоев Г.Г.) кэм өйдөбүлүн тыл суолтатыгар олоҕуран тойоннооһуна үһүс буолла.

Алтыс хайысха пластическай фольклору түөргүлээн үөрэтиигэ ананна, манна тирии иһиттэри оҥорууга үгэс буолбут технологияны үөрэтэн Таатта Баайаҕатыттан 10 кылаас үөрэнээччитэ Романова Алина (салайааччылара Дедюкина С.П., Неустроева Г.И.) бастаата. Оттон саха мас тутууларын чинчийбит "Айыы кыһатын" 10 кылааһын үөрэнээччитэ Кривошапкина Екатерина (салайааччылара Дьяконова М.Н., Тимофеева С.Д.) үлэтин сыанаһыттар иккис оҥордулар. Үһүскэ эмиэ ити оскуола 6 кылааһыттан Егоров Айтал (салайааччы Каженкин Р.Н.) кыл-сиэл оҥоһуктары үөрэтэн тигистэ. Бу секцияҕа барыта 10 үлэ киирбит.

Саха ийэ тылын туругун, сайдар кэскилин, Мандар Уус "Айыы тыла. Ойуу тыла" кинигэтин ис хоһоонун эридьиэстиир хайысхаҕа ордук элбэх кыттааччы кэлэн икки аҥыы бөлөҕүнэн иһиттилэр, инньэ гынан манна миэстэ ахсын иккилии үлэ буолла. Бастаабыттар ахсааннарыгар Попова Сардаана, тылбаас салаатын 1 кууруһун устудьуона аныгы ырыа тылын-өһүн, Данилова Яна, эмиэ ити салаа 4 кууруһуттан, тылы сыыһырдыыны ырытан киирдилэр. Иккискэ Бурцева Алина (үһүөннэрин салайааччыта Герасимова Е.С.) аныгы ватсап тылын-өһүн, Слепцова Алена (Таатта Тыараһатын 7 кылааһын үөрэнээччитэ, салайааччыта Егорова Р.Н.) айыы тылын, ойуу тылын уруһуйдарын өйдөбүллэрин көрөн тигистилэр. Слепцова Снежана (Норуот художественнай култууратын салаатын 1 куурус устудьуона, салайааччы Ефимова Л.С.) саха төрүт дьарыгар "Ҥ" дорҕоон туттуллуутун көрбүт үлэтэ, "Айыы кыһатын" 6 кылааһын үөрэнээччитэ Семенов Дьулус салайааччытын Слепцов Виталий Архипович көмөтүнэн сахалыы ааттары, аат суолтатын ырыппыта үһүс буоллулар.

Оҕолор айар үлэлэрин быыстапкатыгар 19 үлэ турбутуттан бастыҥ үлэнэн ХИНТКҮ 2 кууруһун устудьуона Данилова Оксана сиэлтэн оҥоһуктарын билиннилэр. Дьокуускай к. Сервис технологическай техникумун устудьуоннара Федорова Алина, Ноговицына Анна кыттыһан тикпит кытыылаах сонноро иккис истиэпэннээх дипломунан наҕараадаланна. Таатта лицейиттэн 9-с кылаас уолаттара Павлов Евгений, Егоров Милан, Пономарев Александр маска оҥо быһан олоҥхо уобарастарын оҥорбуттара үһүс буолла.

Көстөрүн курдук, ханна оҕо-ыччат төрөөбүт ийэ тылынан үөрэнэр даа, онно кыайыы-хотуу көтөллөнөн, ситиһии сиэттиһэн кэлэ турар. Үөрэппит оҕолорбут, көтүппүт чыычаахтарбыт бэйэлэрэ уһуйааччы буолан тиийэн кэлэн үөрэнээччилэрин бастыҥ ааттатан барбыттарын киэн тутта кэпсиибит. Араас эйгэттэн, элбэх сиртэн хабыллан кыттыбыт оҕолорго, салайааччыларга кэлэр ааҕыыларга уопут буолар гына тэрийэ сатаатыбыт.

Билимҥэ бастыҥ билинии диэн кыттыы уонна бэчээккэ тахсыы буолар, ону быйыл бастакы тэрээһинэ буолан Баайаҕалар, Таатталар итинник миэстэлээн эҥин көҕүлээтилэр. Түмүккэ кыайыылаах оҕолору мааны кинигэлэринэн, аһынан-үөлүнэн байымнык бэлэх туттулар, маныаха эбии сыанаһыттарга, тэрийээччилэргэ эмиэ бойум кэһиилээхтэр. Маны саха үтүө үгэһин быһыытынан ылынан бары да манньыйа үөрдүбүт, устудьуон аймах аска санаата хото көтөҕүллүбүтэ биллэр. Н.И. Егоров-Баайаҕыын бэйиэт бэйэтин идэһэтиттэн сүгэн-көтөҕөн киллэрэн эттээн-эллээн, аны муҥха балыгыттан куулунан тиэйэн аҕалан оҕолорго өлүүлээн ааспытын хайдах да ааттаабат буолар сатаммат. Кини ити курдук бэриниилээхтик Мандарын аатын ааттатарга турунан сылдьарын бар дьон билиэхтээх. В. Яроев худуоһунньук мөлүйүөнүнэн үбү кутан туран Мандар Уус туһунан өҥнөөх альбому таһаартарбытын бастаабыт оҕолорго туттарбыты атыттар ымсыыра эрэ хааллыбыт. Ити курдук барҕалаах "Мандар ааҕыылара" диэн дьоро күн Хотугулуу-Илиҥҥи норуоттар тылларын уонна култууратын үнүстүүтүгэр үрдүк күүрүүлээх таһымҥа буолан ааста. Ыччат хайаан даҕаны Мандар Уус ыра санааларын ис кутугар угуннаҕа буолуо диэн эрэл санаалаах аныгыскы ааҕыылары хайдах тэрийэр туһунан толкуйдаан киирэн барабыт.

Кэмпириэнсийэ иилээн-саҕалаан тэрийбит Г.С. Попова-Санаайа, ХИФУ культурологияҕа кафедратын профессора, п.н.к.

 

Сыһыарыы. Кэмпириэнсийэ Резолюцията

 

М.К. Аммосов аат. Хотугулуу-Илиҥҥи Федеральнай университет

Арассыыйа Бэдэрээссийэтин Хотугулуу-Илиҥҥи норуоттарын тылларын уонна култууратын Үнүстүүтэ

Культурология кафедрата

Култуура уонна фольклор кафедрата

 

РЕЗОЛЮЦИЯ

Дьокуускай к. 2015 сыл сэтинньи 20 күнүгэр

Б.Ф. Неустроев-Мандар Уус 70 сааһыгар анаан тэрийбит

Өрөспүүбүлүкэтээҕи Бастакы "Мандар ааҕыылара" научнай-практическай конференция

 

Саха Өрөспүүбүлүкэтин П.А. Ойуунускай аат. Судаарыстыба Бириэмийэтин лауреата, култуура үтүөлээх үлэһитэ, норуот маастара тимир ууһа, Духуобунас Академиятын академига, Таатта улууһун Бочуоттаах олохтооҕо 70 сааһыгар анаан тэрийбит Өрөспүүбүлүкэтээҕи Бастакы "Мандар ааҕыылара" научнай-практическай конференцияҕа Саха Сирин улуустарыттан уонна куораттарыттан барыта 133 оскуола саастаах оҕо, устудьуон, магистрант, аспирант, учуонай уонна идэлээх ыччат кыттан аҕыс секцияҕа мустан научнай дакылаат аахта, айар үлэтинэн быыстапкаҕа кытынна. Бары үлэ таһыма ирдэбилгэ хардарсарын ыйан туран, хомуурунньукка киллэрэргэ быһааран, секция ахсын үстүү бастыҥ үлэ дипломунан бэлиэтэннэ. Конференция ис хоһооно үөрэнэр оҕо-ыччат билиитэ-көрүүтэ кэҥээн дириҥииригэр улахан туһалаах буолла.

Тыл эппит, дакылаат аахпыт дьон, кыттааччылар бары Б.Ф. Неустроев-Мандар Уус саха уонна бары олохтоох хотугу омуктар төрүт култуураларыгар киллэрэр кылаатын үрдүктүк сыаналаатылар, омук быһыытынан тиллэн, салгыы сайдар-үүнэр туһаайыыны ыйарын өйдөөбүттэрин биллэрдилэр. Саҕалаабыт үлэлэрин, этэр саҥа санааларын тиһэҕэр тириэрдэн билим үрдүкү чыпчаалыгар, айымньылаах үлэ киэҥ аартыгар тахсар соруктарын эттилэр.

Конференция кыттыылаахтара киирбит этиилэри түмэн маннык Резолюцияны ылыннылар уонна этиилэрин тустаах араҥаларга уонна салалтаҕа туһаайаллар:

Саха Өрөспүүбүлүкэтин Үөрэҕин тэрилтэлэригэр, педагогтарга, төрөппүт уопсастыбаннаһыгар - оҕону-ыччаты норуот маастара Б.Ф. Неустроев-Мандар Уус билии уонна духуобунас эйгэтигэр муспут нэһилиэстэбэтигэр кытыарарга, "Мандар кыһата" оскуола уопутун өрөспүүбүлүкэҕэ бүттүүн тарҕатарга;

М.К. Аммосов аат. Хотугулуу-Илиҥҥи Федеральнай университет культурология уонна философия кафедраларыгар - 2016-17 үөрэх сылыттан саҕалаан үнүбэрсиэт бары салааларыгар бастакы куурус устудьуоннарыгар Б.Ф. Неустроев-Мандар Уус үлэлэрин билиһиннэрэн "Мандар ааҕыыларын" тэрийэллэригэр;

Арассыыйа Бэдэрээссийэтин Хотугулуу-Илиҥҥи норуоттарын тылларын уонна култууратын Үнүстүүтүгэр - кэлэр сылтан Өрөспүүбүлүкэтээҕи Иккис уонна салгыы "Мандар ааҕыылара" научнай-практическай конференцияны иилээн-саҕалаан ыытарыгар;

М.К. Аммосов аат. Хотугулуу-Илиҥҥи Федеральнай үнүбэрсиэккэ - оскуола саастаах оҕолорго, устудьуон, магистрант, аспирант ыччакка, эдэр исписэлиистэргэ, учуонайдарга анаан регионнааҕы "Мандар ааҕыылара" научнай-практическай конференциялары ыытан салгыы Арассыыйа таһымыгар таһаарарга; Үөрэххэ уонна уопсастыбаннай үлэҕэ ситиһиилээх устудьуоҥҥа Б.Ф. Неустроев-Мандар Уус аатынан стипендияны олохтуурга; Б.Ф. Неустроев-Мандар Уус үлэлэрин нуучча уонна омук тылларыгар тылбаастыыры тэрийэргэ;

Үөһэ ааттаммыт үөрэх тэрилтэлэригэр - "Мандар ааҕыыларын" матырыйаалларын бэчээттииргэ үп-харчы буларга;

Саха иһитиннэрэр көрдөрөр национальнай компаниятыгар - Б.Ф. Неустроев-Мандар Уус идиэйэлэрин тарҕатарга анаан утумнаахтык тахсар бырагыраамалары, анал биэриилэри олохтуурга;



Доҕоттор кэпсээ

Ырытыыга кыттабын

Защитный код
Обновить

Гороскоп

01_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy_copy

2014 сыл гороскоба

Доруобуйа, күүс-кыах да тупсар сыла иһэр. Үтүө дьайыылаах уларыйыы тахсар сибикитэ улахан. Урукку сылларга холоотоххо, ыарахан таһаҕаһы бырахпыт курдук…

RSS-Лента