Атамай нэһилиэгэр өр сылларга аҕа баһылыгынан үлэлээбит Федоров Роман Кононович өйөбүлүнэн "Сыл 10 бастыҥ үөрэнээччитэ" диэн эриэйтинниир күрэх үтүө үгэһин баһылык Павлов Айсен Егорович салҕаан, 2022-2023 үөрэх дьылын бастыҥ оҕолоро дойдубут тэбэр сүрэҕэр Москубаҕа, итиэннэ саамай кэрэ, баай устуоруйалаах Санкт-Петербург куоракка идэни талар туурга баран кэллилэр.
Санатар буоллахха, «Нэһилиэк сайдыыта - ыччатыгар» диэн ааттаах бырайыагы 2016 с. оскуола дириэктэрин үөрэх чааһыгар солбуйааччы Терентьева М.П. суруйан, олохтоох дьаһалта иннигэр көмүскээн, «инникилээх бырайыак» диэн сыаналанан өйөбүл ылбыта. Ол чэрчитинэн 2017-2018 сс. оскуола бастыҥ үөрэнээччилэрэ дойдубут улахан куораттарынан туурга сылдьан кэлбиттэрэ.
Быйылгы күрэх кыайыылаахтара Иванова Ильза, Павлова Айтаана, Семенов Данил, Филиппов Савелий, Сидорова Карина, Ефремов Роберт, Павлов Сахамин, Саввинова Сахая, Иванова Юлиана, Александров Антон 7 күн устата 2 улахан куораты көрөн, дуоһуйа сынньанан, элбэҕи билэн-көрөн кэллилэр. Оҕолор араас туһалаах экскурсияҕа сылдьан, дойдубут устуоруйатын илэ көрөн, оҕо саас биир умнуллубат кэрэ-бэлиэ кэмин атаардылар.
Ол курдук, Санкт-Петербургка Эрмитажка, Петропавловскай кириэппэскэ, Петергоф фонтаннарыгар, «Дива-остров» сынньанар пааркаҕа сырыттылар.
Москубаҕа Саха сирин бэрэстэбиитэлистибэтигэр, Москубатааҕы судаарыстыбаннай университекка, Яндекс түмэлигэр, Москвариумҥа, ВДНХ-ҕа, аквапаркаҕа сылдьан, оҕолор элбэх саҥаны биллилэр, арыйдылар.
Нэһилиэк кэнчээри ыччата сайдарыгар, билиитэ-көрүүтэ кэҥииригэр анаммыт бырайыагы өйөөн, олус үчүгэй тууру бэлэхтээбит баһылыкпытыгар Айсен Егоровичка үөрэнээччилэр, оскуола кэллэктиибин уонна төрөппүттэрин аатыттан барҕа махталбытын тириэрдэбит.
Оҕолору арыаллаан илдьэ сылдьыбыт учуутал Акулина Филиппова.