Тыа сирин сайдыытын сокуона

24.08.2015 14:14 | Автор: Admin | Көрдүлэр: 2048   
Печать

selskoeТ/х миниистирэ А.Артемьев эппитинэн, Саха сирин олохтоохторо тыа сирин сайдыытыгар туһуламмыт сокуон барылын көхтөөхтүк дьүүллэһэр.

Ордук элбэхтик т/х бородууксуйатын соҕотуопкалыыр тэрилтэлэргэ туттарыллар сыаната чопчу уонна мэктиэлэммит буолуохтаах диэн туруорсаллар. Бу боппуруос Ил Дархан тус көрүүтүгэр сылдьар. Санаттахха, кини атырдьах ыйын 9 к. – Чурапчыга уонна атырдьах ыйын 13 к. Үөһээ Бүлүү Тамалакааныгар фермердэри, нэһилиэк, улуус баһылыктарын кытары көрсүбүтэ.

Чурапчылар фермердэри тустаах эбийиэктэринэн, сүөһүнэн, тиэхиньикэнэн хааччыйары туруорсубуттара. Онуоха биир суол быһыытынан т/х-нан дьарыктаммат биирдиилээн дьонтон атыылаһар наадатын ыйбыттара. Оттон үөһээ бүлүүлэр т/х сайдыытыгар туһуламмыт тосхоллору өрөспүүбүлүкэ уонна олохтоох бүддьүөт тэҥҥэ үллэстэн үбүлүүллэригэр этии киллэрбиттэрэ. Сокуону оҥорууга бу уо.д.а. санаа барыта болҕомтоҕо ылыллыа диэн эрэннэрэллэр.

Сокуон барылыгар олохтоох салайыныы уорганнара чопчу хайдах дьаһаныахтаахтара, Саха сирин уратыта, тыа хаһаайыстыбатын аныгы ньыманан толору хааччыйыы, сүрүн бородууксуйаны батарыы мэктиэлэммит сыаната, инвестицияны тардыы, билим өттүттэн өйөбүл, т/х үлэһиттэрин хамнаһа, сир боппуруоһа, быһата, тыа хаһаайыстыбатын уонна тыа сирин сайдыытыгар туһуламмыт бэрт элбэх хайысха киирэ сылдьар (http://www.sakha.gov.ru/node/254842 аадырыска киирэн көрүөххэ сөп).

Сокуон барыла Ил Түмэн көрүүтүгэр бу күһүн киириэҕэ диэн СӨ Ил Дарханын уонна Бырабыыталыстыбатын дьаһалтатын СМИни кытары үлэҕэ салалтата иһитиннэрэр.