Бүгүн Ленскэйгэ, Өймөкөөн, Уус Майда оройуоннарыгар уонна Сахабыт сирин хотугулуу-илиҥҥи өттүгэр кыратык ардыа. Ол туһунан гидрометеорология киинин салайааччыта Татьяна Маршалик кылгастык иһитиннэрдэ.
Бу икки хонукка өрөспүүбүлүкэҕэ халлаан туругун оҥорбут циклон сыыйа илин диэки сыҕарыйыа. Онон киин уонна арҕаа улуустарга сөҥүүлэр тохтуохтара. Арай кэлэр хонукка Саха сирин илиҥҥи өттүгэр кыратык ардыа уонна сөрүүдүйүө. Маны сэргэ, Байкалтан соҕуруулуу-арҕааҥҥы оройуоннарга хойуу сылаас салгыннаах циклон кэлэн, салгын температурата сыыйа үрдүө.
«Буруо туһунан этэр буоллахха, арыый аҕыйаата эрээри, син биир үөскүүр кутталлаах. Бэҕэһээ уонна бүгүн Бүлүү бөлөххө Хабаровскай кыраайтан уонна Уус Майдаттан тиийбит буруо сыыйа илин диэки сыҕарыйар. Тыал соҕуруулуу-илиҥҥи хайысхаҕа көспүтүнэн уонна онно элбэх баһаар умуллубутунан, аны хойуу буруо тарҕаммат ини диэн эрэнэбит», – диэтэ Татьяна Маршалик.
Сонун төрдө: СӨ Ил Дарханын уонна бырабыыталыстыбатын пресс-сулууспата