Атырдьах ыйын 10-12 күннэригэр Амма улууһугар СВО-ҕа сылдьар уолаттарбытыгар анаан таҥас тигиитигэр үс күннээх үөрэх буолан ааста.
Үөрэхпитигэр отучча иистэнньэҥ кыттыыны ылан, эр киһи байыаннай таҥаһын тигиигэ билиилэрин, сатабылларын эбии хаҥаттылар. Үөрэх кэмигэр Амма нэһилиэгин аатыттан нэһилиэк иистэнньэҥ Далбар Хотуттарыгар иистэнэр массыына бэлэх ууннулар.
Мантан ыла Амма нэһилиэгин аҕа баһылыгын Артемьев Михаил Алексеевич өйөбүлүнэн, Амматтан Шараборина Надежда Васильевна, Григорьева Ия Ивановна, Мээндигэттэн Пухова Нелли Викторовна иилээн-саҕалаан, Амма улууһун Далбар Хотуттара бииргэ үлэлэһэргэ бэлэмнэрин эттилэр уонна салгыы байыаннай таҥас тигэргэ анаан быһыллыбыт таҥаһы илдьэ хааллылар.
СВО-ҕа сылдьар уолаттарбыт этэҥҥэ сылдьан эргиллэн кэлэллэрин туһугар, ийэлии илиибит сылааһын иҥэрэн, алгыс тылбыт таҥас нөҥүө тиийэ туруохтун!
Бука бары - КЫАЙЫЫ туһугар!