«Саҥа дьон» (Новые люди) фракция дьокутаата, Госдума вице-спикерэ Владислав Даванков РФ Холуобунай кодексыгар албакаат үлэтигэр мэһэйдэһии иһин 2 сылга диэри көҥүлү сарбыйар Ыстатыйаны эбэргэ этии киллэрдэ. Сокуон бырайыага РФ Бырабыыталыстыбатыгар уонна Үрдүкү суутугар көрүллүөҕэ.
«Холуобунай кодекска судьуйалар уонна борокуруордар үлэлэригэр орооһуу иһин буруйга тардыы көрүллэр. Оттон албакаат үлэтигэр мэһэйдээччилэргэ туох да миэрэ суох. Ол туохха тиэрдибитин Елена Милашинаҕа уонна Александр Немовка саба түһүүлэргэ көрүөххэ сөп. Дьиҥэр, сокуон манныгы кытаанахтык бохсуохтаах дии саныыбын», – диэн Даванков тоһоҕолоон эттэ.
Докумуон Минюст 2020 сыллаахха уопсастыбаннай ырытыыга таһаарбыт, ол эрээри Госдумаҕа киирбэтэх сокуонун бырайыагар олоҕуран оҥоһулунна. Манан Холуобунай кодекска 294.1 (Албакаат сокуонунан үлэтин харгыстааһын) Ыстатыйаны эбэн биэрэргэ туруорсаллар.
«Суукка дьону көмүскүүр үлэһиттэр олохторугар куттал суоһуо суохтаах. Албакаат үлэтин харгыстааһын – көмүскэнээччи быраабын кэһии уонна сиэрдээх быһаарыы тахсыытыгар мэһэйдэһии буолар. Онон, бу алҕаһы туоратан, албакааттар куттала суох үлэлииллэрин мэктиэлиирбит уолдьаста», – диэн Даванков санаатын ситэрэн биэрдэ.
Сонун төрдө: «Cаҥа дьон» баартыйа пресс-сулууспата