Япония бырабыыталыстыбата, Арассыыйаны утары сааҥсыйалар саҥа пакеттарын чэрчитинэн, Арассыыйаҕа 1,9 лиитирэттэн улахан кыамталаах массыыналары киллэрэри бопто. Бу туһунан ТАСС Япония экэниэмикэҕэ, атыыга уонна бырамыысыланнаска миниистирэ Ясутоси Нисимуруга сигэнэн иһитиннэрэр.
“Хааччахтааһын атырдьах ыйын 9 күнүттэн сокуоннай күүһүгэр киириэҕэ”, – диир кини.
Хара испииһэккэ гибрид мотуордар уонна таһаҕас таһар көлөлөр “покрышкалара” эмиэ киирбиттэр. Токиоҕа "Арассыыйаҕа сыһыаннаах бобуулары тутуһууну кытаанахтык хонтуруоллуохпут" диэн бэлиэтээтилэр.
Ол курдук, Япония үбүн министиэристибэтэ ааспыт сыл баччалардааҕы көрдөрүүтүттэн 2023 с. маҥнайгы аҥаарыгар Арассыыйаҕа тахсар массыына ахсаана 32,8 % үрдээбитин туһунан эппит. Массыына уопсай экспордын көрдөрүүтүттэн урут сүүрдүллэ сылдьыбыт массыыналар киэннэрэ 26 %-ны ылаллар. Былырыын Арассыыйа олохтоохторо 200 тыһ. массыынаны 250 млрд иеҥҥэ (1,8 млрд дуоллар) атыыласпыттар.
Бу иннинэ Евросоюз эмиэ Арассыыйаҕа 1,9 л үрдүк кыамталаах мотуордаах массыына экспордын боппута, о.и. электромобиллар уонна гибридтэр эмиэ хапсыбыттара.
rg.ru