Сыл бүтүөр диэри уонча маннык эпэрээссийэни оҥорорго былаанныыллар.
СӨ 2-с №-дээх Мэдиссиинэ суһал көмөтүн киинигэр Уһук Илиҥҥэ аан бастакынан быар циррозтаах ыарыһахха малоинвазивнай (ыараһах тириитин, этин быспакка, хайыппакка, тымырынан курдары киириллэр) эпэрээссийэни оҥордулар. Эпэрээссийэ хайдах оҥоһулларын саха быраастарыгар Н.И. Пирогов аатынан Арассыыйа национальнай чинчийэр мэдиссиинискэй университетын хирургия ыарыыларыгар кафедратын бэрэпиэссэрэ, РФ наукатын үтүөлээх деятелэ Владимир Шиповскай көрдөрдө.
“Биһиги быара хаан барыылаах декомпенсированнай циррозтаах ыарыһаҕы эпэрээссийэлээтибит. Саха сиригэр маннык диагнозтаах 500 киһи диспансер учуотугар турар, олортон 30 бырыһыаннара уорган көһөрүүтүгэр наадыйар. Эпэрээссийэ маннык ньымата Москубаҕа эрэ оҥоһуллар, атын эрэгийиэннэргэ тарҕамматах”, – диэн 2-с нүөмэрдээх ӨБ Мэдиссиинэ суһал көмөтүн киинин лучевой диагностика киинин сэбиэдиссэйэ Дыгын Попов кэпсээтэ”.
Ыарыһаҕы быыһыыр туһугар быраастар малоинвазивнай эпэрээссийэ ньыматын туһаннылар, бу эпэрээссийэ рентгеноскопиянан көрөн туран оҥоһуллар (TIPS). Быраастарга бу ньыманан хайдах үлэлиири көрдөрөөрү Н.И. Пирогов аатынан Арассыыйа национальнай чинчийэр мэдиссиинискэй университетын хирургия ыарыыларыгар кафедратын бэрэпиэссэрэ, РФ наукатын үтүөлээх деятелэ Владимир Шиповскай анаан-минээн кэлбит.
Эпэрээссийэ быар цирроһун эмтээбэт, трансплантацияҕа наадыйар ыарыһахтар дуонары күүтэллэригэр, олохторун хаачыстыбатын тупсаралларыгар наадалаах.
“Ыарыһах быар цирроһуттан сылтаан түөртэ хаана барбыт. TIPS эпэрээссийэтин ыытыы – өрөспүүбүлүкэҕэ бу ньыманан эмтээһин тэнийэригэр улахан төһүү күүс буолар. TIPS үчүгэйэ диэн улахан тыраамбата суох ааһар”, – диэн санаатын үллэстэр Владимир Шиповскай.
Эпэрээссийэ пациент этин-сиинин быһыыта, хайытыыта суох моойго баар тымырга катетер киллэрэн оҥоһуллар, “местнай анестезиянан” утуталлар. Онтон тымыр булаары ультразвук аппараатын туһаналлар. Рентгенинэн көрөн туран, катетер тымыр устун быар тымырыгар, онтон салгыы “портальнай” тымырга тиийэр. Дьэ онтон катетерынан стент туруоран, ыалдьар быары ордук хаан эргиириттэн босхолууллар.
ЯСИА