Айсен Николаев Ленскэй оройуонугар үлэ чэрчитинэн сырыытыгар Оҕо ускуустубатын тутуутун бэрэбиэркэлээтэ.
“Ленскэй кырачаан олохтоохторо талааннарын, дьоҕурдарын сайыннаралларыгар уонна ускуустубаҕа сысталларыгар саҥа култуура киинэ аһыллыаҕа. Тутуу үлэтин кэмигэр уонна хаачыстыбалаахтык бүтэрэр туһугар үлэни тэтимирдиэххэ, үлэһит ахсаанын эбиэххэ наада”, – диэн бэлиэтээтэ Ил Дархан.
Тутуу учаастагын начаалынньыга Петр Ксенофонтов билиһиннэрбитинэн, билиҥҥи кэмҥэ тутуу 25 %-на бэлэм, матырыйаал атыылаһыллан бүппүт, онтон улахан аҥаара миэстэтигэр тиэрдиллибит. Баһаарынай резервуардар, носуос ыстаансыйата туруоруллубуттар. Ол эрээри, кыраапыктан хаалыы баар, эбийиэккэ 28 киһи үлэлиир.
Оскуола тутуута 2020 с. саҕаламмыт эрээри, бэдэрээттээх тэрилтэ кыаммакка үлэ тохтотуллубут. Онтон 2022 с. Ленскэй дьаһалтата Хаҥалас улууһун “Промстрой” ХЭТ кытта саҥа хантараагы баттаспыт, ол быһыытынан тутуу 2023 с. 4-с кыбаарталыгар түмүктэниэхтээх. Ол эрэн, эбийиэги бу сыл балаҕан ыйын бүтүүтэ бэлэм оҥорордуу былаанныыллар.
Даҕатан эттэххэ, үс этээстээх оскуола 360 үөрэнээччигэ ананар, 4 тыһ. кв. м. икки таһымнаах 250 миэстэлээх кэнсиэрдиир саала, 70 миэстэлээх аактабай саала, 10-нан үөрэнэр кылаас баар буолуоҕа.
Бырайыагы “Доступная среда” бырагырааманан оҥордулар, саҥа тутуу лииптээх, пандустаах, инбэлиит оҕолорго анал туалеттаах буолуоҕа.
СӨ Ил Дарханын уонна Бырабыыталыстыбатын пресс-сулууспата.
Андрей Сорокин, ЯСИА хаартыскалара.