Уһук Илин эбийиэктэригэр ыытыллыбыт олорор сири тупсарыы бырайыактарын иккис куонкуруһугар өрөспүүбүлүкэттэн биэс улуус ситиһиилээхтик кытынна. Бырайыактары олоххо киллэрэргэ уопсайа 600 мөл. солк. көрүллүөҕэ. Бу туһунан Архитектура уонна куораты тутуу дьаһалтатыттан иһитиннэрэллэр.
Ол курдук, Мэҥэ Хаҥалас Майата “Кыайыы Аартыга” бырайыагар - 50 мөл. солк., Орто Халыма киинин Кыайыы болуоссатын бырайыагар - 100 мөл. солк., Бүлүү куоратын “Ыллыыр кумах” биэрэк бырайыагар - 150 мөл. солк., Мииринэй куоракка паарка тутуутун бырайыагар - 150 мөл. солк. уонна Нерюнгрига култуура пааркатын бырайыагар 150 мөл. солк. көрүллүөҕэ.
Быйыл барыта 496 сайаапка киирбититтэн VIII Бүтүн Арассыыйатааҕы куонкуруска 145 кыайыылааҕы, онтон II Уһук Илин эрэгийиэннэр куонкурустарыгар 50 кыайыылааҕы биллэрдилэр. Даҕатан эттэххэ, бу куонкурус тэриллиэҕиттэн 479 кыайыылаах бырайыак олоххо киирбит, өссө 353 тутулла сылдьар.
Санатар буоллахха, куорат эйгэтин тупсарыыга анаммыт бастыҥ бырайыактары талыы куонкуруһа 2018 c. ыытыллар. Уонна “Олорор сир уонна куорат эйгэтэ” нац-бырайыак “Тупсаҕай куорат эйгэтин оҥоруу” федеральнай бырайыагар киирсэр. Манна 200 тыһ. диэри нэһилиэнньэлээх куораттар уонна федеральнай эбэтэр региональнай суолталаах историческай поселениелар кытталлар.
Куонкуруска Саха сириттэн барыта 14 сайаапка кыттыбыта. Бастакы түһүмэх кэннэ өрөспүүбүлүкэ биэс бырайыага 300 солк. үбү ылбыта. Ол Ленскэйгэ Орджоникидзе уулуссаны туоруур миэстэҕэ, Бороҕоҥҥо Мүрү күөл кытыыта, Жатайга В.П. Шамшин бульвара, Бэрдьигэстээххэ Кыайыы болуоссата уонна Үөһээ Бүлүүгэ И.Н. Барахов скверэ.
СИА.