Быыбар балаҕан ыйын 8–10 күннэригэр буолуоҕа.
От ыйын 20 күнүгэр, чэппиэргэ, Айсен Николаев Саха Өрөспүүбүлүкэтин баһылыгын дуоһунаһыгар хандьыдаат дастабырыанньатын тутта.
“Өрөспүүбүлүкэм уонна кини олохтоохторун туһугар үлэлииргэ эппиэтинэс ылбыппыттан долгуйабын. Быыбар иннинээҕи хампаанньа үлэм кыраапыгар охсуо суоҕа – элбэх үлэ күүтэр. Эһиэхэ өйөбүлгүт иһин махтанабын, миэхэ ол күндү”, – диэн Айсен Николаев телеграм-ханаалыгар суруйар.
Санатар буоллахха, Айсен Николаев 2018 с. Саха Өрөспүүбүлүкэтин баһылыгын эппиэтинэһин толорооччунан анаммыта уонна бу сыл балаҕан ыйыгар, быыбардааччылар 71,4 % ылан, эрэгийиэн баһылыгынан талыллыбыта.
Саха сирин баһылыгын талыы балаҕан ыйын 8, 9,10 күннэригэр буолуоҕа. Бу күннэргэ өссө улуус, нэһилиэк баһылыктарын, Ил Түмэн дьокутааттарын, бэрэстэбиитэллээх уорганнары уонна Дьокуускай куорат дууматын талыахтара.
Айсен Николаев телеграм-ханаалыттан хаартыска.
СИА.