От ыйын 17 күнүгэр Эргэ куорат түөлбэтигэр скульптор Николай Чоччасов уонна архитектор Марина Рожина “Уулуссаҕа дүлүҥү тэлгэтээччи” композициялара туруорулунна.
Саҥа 1700 мм. үрдүктээх скульптура тимиртэн дьаптайан оҥоһуллубут, постамена суох.
Кэрэхсэбиллээҕэ диэн скульптура оҥоһуутугар Ленин бэрэспиэгин өрөмүөннүүргэ аспаал аннынааҕы хаһыыттан көстүбүт дүлүҥнэри туһаннылар. Бу дүлүҥнэри 1930-с сыллардаахха уонна Аҕа дойду сэриитин иннигэр уулуссаҕа тэлгэтэллэрэ. Даҕатан эттэххэ, бу күннэргэ Ленин бэрэспиэгин уонна Чепалов уулуссаларын быһа охсуһуутугар суол өрөмүөннэнэр сириттэн эмиэ маннык дүлүҥнэр көһүннүлэр.
Оччолорго уулуссаны дүлүҥүнэн тэлгэтии ыарахан үлэтиттэн толлубакка кыайыылаахтык тутталларын туһунан хаһыакка суруйаллара.
“Биһиги Эргэ куоракка оччолортон ордон хаалбыт саамай үчүгэй туруктаах дүлүҥнэри көһөрбүппүт. Бу түгэҥҥэ “Алмаасэргиэнбаан” аттыгар дүлүҥү тэлгэтээччи скульптуратын уурар туһунан санаа үөскээбитэ”, – диэн ВООПИК Саха сиринээҕи салаатын сүбэтин бэрэссэдээтэлэ Руслан Васильев суруйар.
Оонньуу-күлэ таарыйа эттэххэ, бэс ыйын саҕаланыыта Николай Чоччасов “скульптура турдаҕына биирдэ бытыкпын кырыныам” диэбиттээх, ол иһин биһиги киниэхэ төлөрүөннүү сырыттыбыт. “Скульптура ситэ тура илик, өссө ситэрэр-хоторор үлэ баар. Онон эппит тылбын өссө тутуһабын”, – диэн хоруйдаата. Ону тэҥэ композицияны официальнайдык сүрэхтээһин былааннамматын бэлиэтээтэ.
Андрей Шилов
«Yakutia24/Якутия24»
