Саха сиринээҕи гидрометеорология сулууспатын иһитиннэриитинэн, Өймөкөөн улууһун Орто Балаҕан уонна Томтор бөһүөлэктэригэр уу таһыма түстэ.
Өрөспүүбүлүкэтээҕи “Өймөкөөн” айан суолун 157 килэмиэтиригэр, Томтор бөһүөлэгиттэн 3 килэмиэтирдээх сиргэ, Куйдуһун үрэҕин күргэтин уу суурайда. Томтор уонна Сордоҥноох бөһүөлэктэр икки ардыларыгар суол быһынна, сырыы тохтоото. Сордоҥноох нэһилиэгин Орто Балаҕан бөһүөлэгэр биир да дьиэ-уот, тиэргэн ууга барбата. 3 сиргэ бөһүөлэк иһинээҕи муниципальнай суол сууралынна. Уу таһыма түһэ турар. Бүгүн сарсыарда 09.00 чаастааҕы туругунан, уу таһыма 10 сантымыатырынан түстэ.
2-с Бороҕон нэһилиэгин Томтор бөһүөлэгэр ууга барбыт дьиэ-уот, тиэргэн суох. Уу таһыма түһэ турар. Ол курдук, бу сарсыарда 09.00 чаастааҕы туругунан, уу таһыма 5 сантымыатырынан түстэ.
Өймөкөөн бөһүөлэгэр 18 тиэргэн ууга барда. Онно барыта 63 киһи, ол иһигэр 20 оҕо, олорор. 4 сиргэ бөһүөлэк иһинээҕи суолу, 2 сиргэ ууну аһардар турбаҕы кэлэр суолу уу суурайда. Бүгүн сарсыарда 09.00 чаастааҕы туругунан, уу таһыма 2 сантымыатырынан түстэ (560 см буолла).
Миэстэтигэр уу таһымын хонтуруоллуурга улуус ОГ КЧСиБП, Өймөкөөннөөҕү 1 ОГ МГПО уонна нэһилиэнньэлээх пуунньар 3 ОГ күнүстэри-түүннэри үлэлииллэр, кэтээн-көрөллөр. Быстах кэмнээх уу постара турдулар, 3 чаас буола-буола уу таһыма кэмнэнэр. Быстах кэмҥэ дьону олордор 3 пуун арылынна. Эвакуацияламмыт ыал суох, дьон дьиэтиттэн барартан батынар. Ас-үөл, иһэр уу саппааһа толору баар. Ынах сүөһүнү уонна сылгыны хорҕотор анал сирдэр оҥоһуллаллар.
Аҕыйах хонутааҕыта сибээскэ тахсыбатах 11 киһилээх (ол иһигэр 4 дьахтар уонна 3 оҕо) туристар бөлөхтөрүн туһунан эттэххэ, билигин кинилэр Томтор бөһүөлэгиттэн 15 килэмиэтирдээх Кумаар Үрэх диэн сиргэ бааллар. Кинилэр олохторугар уонна доруобуйаларыгар куттал суоһаабат. Тиһэх чахчыларынан, дьахталлар уонна оҕолор этэҥҥэлэр. Бэлиэтээн эттэххэ, бэҕэһээ кинилэргэ Сордоҥноох бөһүөлэгиттэн ас-үөл тиэммит 3 киһилээх 2 вездеход айаннаабыта. Кинилэри хаайтаран олорор сирдэриттэн аҕалар туһугар, Быыһыыр сулууспа Тааттатааҕы филиалыттан тахсыбыт аэромобильнай бөлөх быыһааччылара бэҕэһээ Томторго тиийбиттэрэ. Халлаан туругуттан көрөн, сүтэн баран көстүбүт туристары бүгүн “Полярнай авиалиния” бөртөлүөтүнэн эвакуациялыахтаахтар. Бэҕэһээ халлаан туруга мөлтөх буолан, быыһыыр кыаллыбатаҕа. Балаһыанньаны толору хонтуруоллуу олоробут.
СӨ Нэһилиэнньэтигэр куттал суох буолуутун хааччыйар судаарыстыбаннай кэмитиэт пресс-сулууспата.
