Бэс ыйын 4-8 күннэригэр “Саханефтегазсбыт” аахсыйалаах уопсастыба үлэһиттэригэр өрөспүүбүлүкэтээҕи бастакы спартакиада ыытылынна. Манна Саха сирин 21 улууһуттан хампаанньа бары структурнай салаатыттан, филиалыттан бэрэстэбиитэллэр кытыннылар. Кинилэр ортолоругар ыраах Арктика улуустарыттан – Аллайыахаттан, Муоматтан, Абыйтан – кыттааччылар эмиэ бааллар.
Спартакиада кыттааччыларын Мэҥэ Хаҥалас улууһугар баар филиал – Аллараа Бэстээхтээҕи ньиэп базата – көрүстэ. Ыалдьыттары “балаакка куоратыгар” түһэрдилэр. Тэрийээччилэр – тэрилтэ идэлээх сойууһун көхтөөх чилиэннэрэ. Тырааныспар логистикатын быһаарыыга, араас улуустан кыттааччылары аҕалыыга, кинилэри түһэриигэ, өрөспүүбүлүкэ таһымнаах күрэҕи тэрийиигэ сүҥкэн үлэни ыыттылар. Ол курдук, тэрийэр кэмитиэт кыттааччылар табыгастаах усулуобуйаҕа олороллорун толору хааччыйдылар: күҥҥэ түөртэ минньигэс аһынан күндүлээтилэр, дуустанар кэбииҥкэтигэр, санузелыгар тиийэ тэрийдилэр.
Түөрт күн устата волейболга, уһуну ыстаныыга, атах оонньуутугар, мини-путбуолга, дуобакка, кыранаатаны быраҕыыга, остуол тиэнниһигэр, дартска, хапсаҕайга, ханаат тардыыга уо.д.а. тыҥааһыннаах киирсиилэр буоллулар. Саамай сытыы түһүмэҕинэн гражданскай оборуона эстэпиэтэтэ ааттанна. ГО эстэпиэтэтин чэрчитинэн тэрийээччилэр сорудахтарынан күн аайы толорор үлэлэригэр – фланеһы задвижкаҕа олордуу, ньиэп бородууктатын оборторорго, боруобаны ыларга, маны таһынан ыксаллаах быһыы-майгы содулун, ол эбэтэр ньиэп тохтуутун туоратарга – идэтийбит үөрүйэхтэрин көрдөрдүлэр. Үчүгэйэ диэн, гражданскай оборуона эстэпиэтэтигэр “Индигиир” сүүмэрдэммит хамаанда кыайда. Бу – ыраах хоту улууска баар үс филиал бэрэстэбиитэллэрэ кыттыһан тэриммит хамаандалара.
“Саханефтегазсбыт” аахсыйалаах уопсастыба генеральнай дириэктэрэ, Саха Өрөспүүбүлүкэтин норуодунай дьокутаата Виктор Лебедев бэлиэтээн эппитинэн, хампаанньа үлэһиттэрэ, эрэгийиэн саамай ыраах улуустарын хаачыстыбалаах ньиэп бородууктатынан тохтоло суох хааччыйар соруктаах Саха сирин биир улахан стратегическай тэрилтэтин бэрэстээбитэллэрэ буолалларын быһыытынан, экологияҕа куттал суох буолуутун хааччыйыахтаахтар. Ыксаллаах быһыы-майгы тахсыбатын туһугар бары күүстэрин ууруохтаахтар, өскөтүн оннук түгэн таҕыстаҕына, сөптөөх дьаһалы суһаллык ылыныахтаахтар. Ол иһин хампаанньа үлэһиттэригэр маннык күрэхтэһиини тэрийэр улахан суолталаах. Генеральнай дириэктэр Саха сирин араас муннугуттан кыттааччылар мустубуттарын, спартакиада хабар географията киэҥин бэлиэтээтэ уонна тыҥааһыннаах күрэхтэһии үтүө үгэскэ кубулуйарыгар эрэннэрдэ.
Спартакиада түмүгүнэн Дьокуускай куоракка баар “Саханефтегазсбыт” АУо салалтатын “АУПteam” хамаандата кыайыы өрөгөйүн биллэ. Бочуоттаах иккис миэстэни Аллараа Бэстээхтээҕи уонна Хаандыгатааҕы филиаллар “Локомотив” сүүмэрдэммит хамаандалара ылла. Үһүс миэстэҕэ “Индигиир” сүүмэрдэммит хамаанда – Абый Үрүҥ Хайатыгар, Муома Хонуутугар, Аллайыаха Чокуурдааҕар баар филиаллар үлэһиттэрэ – тиксэн үөрдүлэр.
Яна БАЙГОЖАЕВА, “Саханефтегазсбыт” АУо пресс-сэкирэтээрэ.