Айсен Николаев от ыйын 11 күнүгэр Булуҥ оройуонугар тиийэ сырытта уонна “Тикси” пуорт уутугар тимирэн сытар “Днепр” аалы дьаһайыы былаанын билистэ. Бу аалга эрдэ кирдээх ууну уонна атын хараабыллартан ордубут ньиэп бородуукталарын харайаллара, онон эколгия кутталлаах.
“Экологияҕа куттал суоһаабатын туһугар бу боппуруос түргэнник быһаарыллыахтаах”, – диэн Айсен Николаев тоһоҕолоон эттэ.
Ил Дархан сорудаҕынан өрөспүүбүлүкэ министиэристибэлэрэ уонна биэдэмистибэлэрэ бу үлэҕэ “Сахаэнерго” АО, “Русгидро” ПАО, “Север” НОЦ, эрэгийиэннээҕи академическай институттары, билим тэрилтэлэрин кыттыһыннарыахтара.
Билиҥҥи туругунан, СӨ Көлө, Экология, ДьУоХХ министиэристибэлэрэ, СӨ Госкомобоспечение тэрилтэтэ уонна Быһыыр сулууспата буолан, кыттыһан, суудунаны дьаһайар үлэ былаанын оҥордулар.
2023 с. үһүс кыбаарталыгар ньиэби ыраастааһын, киртийии таһымын чинчийии уонна үлэ симиэтэтин оҥоруу ыытыллыахтаах. ГСМ “отработкатын” анал оборудованиенан уматан суох оҥоруохтара.
Саахалы туоратыы кэмигэр экологияҕа кутталы үөскэппэт туһугар анал хахханы туруоруохтара уонна сорбент саппааһын хаһааныахтара. Ньиэп бородууктата дьаһаллыбытын кэннэ суудунаны букатыннаахтык дьаһайыы боппуруоһун көрүөхтэрэ.
СӨ Экология министиэристибэтэ сылын аайы бу эбийиэги кэтээн көрөр. От ыйын саҥатыгар ньиэп бородууктата төһөтүн билээри суудуна ис-тас өттүттэн боруоба ылбыттара. Билиҥҥитэ эспэртиисэҕэ сылдьар.
Ил Дархан этиитинэн Бырабыыталыстыба суудунаны дьаһайыы “Генеральная уборка” федеральнай бырайыакка киирэрин туһугар үлэлэһэ сылдьар, ол сатаннаҕына суудунаны дьаһайыы ороскуотун РФ Айылҕа министиэристибэтэ толуйуохтаах.
Ил Дархан уонна СӨ Бырабыыталыстыбатын пресс-сулууспата.