Бу өрөбүллэргэ өрөспүүбүлүкэҕэ 41 ойуур баһаарын умуруордулар.
Магадантан кэлбит парашюттаах десант сулууспатын Уус Майда оройуонугар ыыттылар. Баһаары умуруорууга барыта 918 киһи сылдьар, онтон 153 олохтоох уонна 218 эрэгийиэннэр икки ардыларынааҕы авиация базатын парашюттаах десанын сулууспатын үлэһиттэрэ. Маны тэҥэ 45 массыына уонна көтөр аал үлэлиир. Бу туһунан СӨ ойуур хаһаайыстыбатын уонна экология миниистирин солбуйааччыта Андрей Коноплев иһитиннэрэр.
“Күн бэҕэһээ Уус Майда оройуонугар Магадан баһаарынай сулууспатын парашюттаах десанын 50 киһитэ кэллэ. Ону тэҥэ бүгүн өрөспүүбүлүкэ баһаары утары сулууспатын ыстааты таһынан бөлөҕүттэн 40 киһи уонна Саха сирин быыһыыр сулууспатыттан 10 киһи Аммаҕа уонна Уус Майдаҕа ананан барыахтара. Билиҥҥитэ Уус Майдаҕа МЧС аэромобильнай бөлөҕүттэн уонна быыһыыр сулууспатыттан 37 киһи баһаары бохсууга үлэлиир”, – диэн бэлиэтээтэ Андрей Коноплев.
Ааспыт өрөбүллэргэ авиациянан уонна куосумастан кэтээн көрүү биллэрбитинэн, Саха сиригэр 291 гектардаах 34 ойуур баһаара баара.
“Өрөбүллэргэ 16598 гектар уопсай иэннээх 41 ойуур баһаара умуруорулунна. От ыйын 10 сарсыардатыгар 318511 гектар уопсай иэннээх сиргэ 165 ойуур баһаара баар. Мантан уопсайа 826,5 гектардаах 5 ойуур баһаарын тохтоппуттар. Ол курдук, Уус Майдаҕа – 3, Алдаҥҥа – 1, Үөһээ Халымаҕа – 1. Нэһилиэнньэлээх пууннарга уонна экэниэмикэ эбийиэктэригэр куттал суоһаабат. Өймөкөөҥҥө биир ландшафт баһаара бэлиэтэнэр, оройуоннааҕы КЧС быһаарыытынан, бу уоту умуруоруу тохтотуллубут. Як-40 уонна Росгидромет Ан-26 зондировщик-сөмөлүөттэр өрөбүллэргэ көппөтүлэр”, – диэн ойуур хаһаайыстыбатын уонна экология миниистирин солбуйааччыта иһитиннэрдэ.
Ил Дархан көрдөһүүтүнэн, нэһилиэнньэлээх пууннары харыстыырга уонна ойуур уотун умуруорууга МЧС икки Ми-8-МТВ бөртөлүөтү ыытта. Суһал ыстаапка уот турбут сирдэригэр эбии күүстэри хомуйарга сыал-сорук туруорулунна.
Баһаартан сэрэхтээх буолуу сезона саҕаланыаҕыттан 367873 гектар иэннээх 361 ойуур, уопсайа 4549 гектар иэннээх 48 ландшафт, 0,3 гектардаах 1 ойуур баһаардара бэлиэтэннилэр.
Өрөспүүбүлүкэ сиригэр-уотугар ыксаллаах быһыы-майгы эрэсиимэ уонна баһаары утары эрэсиим салҕанар.
ysia.ru
