Бу оонньууну биир дойдулаахтарбыт, бэйэбит ыччаттарбыт айан таһаарбыттар. Ол курдук, саҥа көмпүүтэр оонньуутун сүрүн дьоруойа Гриффин диэн уолчаан билбэт сиригэр баар буолан хаалар уонна Бирли диэн сымнаҕас оонньуур эһэчээни кытта мүччүргэннээх сырыылаах айаҥҥа турунар. Уоллаах эһэчээн айаннарын былаһын тухары араас мэһэйи туорууллар: бэйэлэригэр холооно суох улахан адьарайдартан мүччү туттараллар, кистэлэҥнээх таайбараҥнары таайаллар.
Daydream: Forgotten Sorrow – Frozen Line хампаанньа 2023 сыл бэс ыйын 14 күнүгэр айан таһаарбыт көмпүүтэргэ аналлаах оонньуута. Бу оонньууга логика, экшен уонна аркада жанрдара, элэмиэннэрэ холбуу туттуллубуттар. Маны таһынан, оонньооччулар мүччүргэннээх быһыы, өй оонньуута, платформер уонна 3d-платформер уратылаахтарын бэлиэтииллэр. Daydream: Forgotten Sorrow соҕотох киһи ааһар оонньуута.
Платформер – көмпүүтэр оонньуутун жанра, бу жанрга оонньуу сүрүн өттүн көнө ньуурдарынан сүүрүү, кирилиэстэринэн ыттыы уонна өстөөхтөрү кыайаары эбэтэр саҥа таһымҥа тахсаары “трофейдары” хомуйуу.
Оҥорон таһаарааччылар саастарын сиппит дьону, оҕо сааһы эргитэн, кыра оҕолуу эһэчээн оонньуурдаах мүччүргэннээх сырыылаах умсугутуулаах оонньууга ыҥыраллар. Оҕуруктаах өй оонньуутун таайыҥ, адьарайдартан куотуҥ, оһолу-моһолу туорааҥ, оччоҕо санаалыын чэпчиэххит, ис туруктуун тупсуоххут.
Кырдьыга даҕаны, хас биирдиибит оҕо сааһыгар халлааны тэлээрэ көтөр аптаах замоктардаах остуоруйа дойдутугар түбэһиэн баҕарбатаҕа баара дуо? Дьэ, онон Daydream аптаах-алыптаах дойдутугар умсарга бэлэмнэниҥ.
Оонньуу сюжета
Биирдэ эмэ ыра санааҕытыгар дуу, түһээн дуу оонньуур эһэчээни кытта хаһан да билбэтэх аптаах дойдугутугар уһуктубуккут дуо, бука, суох буолуо. Daydream: Forgotten Sorrow дьоруойа Гриффин эмиэ хаһан да санаан көрбөтөх дьикти быһылааныгар түбэспит. Ол курдук, оонньуу сюжетынан кини хабыс-хараҥа, урукку олоҕун кутталлаах түгэннэрин көрдөрөр хартыыналардаах кистэлэҥнээх сиргэ сылдьар. Уолчаан бу сиртэн куотар суолугар көтө сылдьар замоктардаах, хайа хапчааннардаах, остуоруйа ойуурдардаах, күннээх дуоллардаах дойдуну арыйар.
Онно киниэхэ Бирли эһэчээн көмөлөһөр. Оонньооччу Гриффини салайар эрээри, Бирлигэ араас хамаанданы биэрэр кыахтаах.
“Идиэйэ оонньуу буолан тахсыар диэри барытын үһүөн оҥоробут”
Кэпсэтэн билбиппит оҥорон таһаарааччылар аан бастаан холонооччу буолбакка, эрдэ MyTona тэрилтэҕэ үлэлии сылдьыбыт дьон эбит. Оонньууларын туһунан сиһилии 3D-дизайнер, Frozen Line тэрийэн таһаарсааччыта Николай Байшев кэпсээтэ.
- Николай, көмпүүтэр оонньуутун оҥорууга ылсар туһунан санаа хайдах киирбитэй?
- Итинник санаа киирбитэ быдан эмэ буолла, инньэ 2016 сыллаахха. Үһүөн, о.э. программист уонна икки дизайнер буоламмыт геймдевкэ бэйэбит күүспүтүн холонон көрөргө быһаарыммыппыт.
Геймдев (англ. game development о.э. оонньуу оҥоруу) – көмпүүтэр оонньуутун дизайныттан саҕалаан ырыынакка атыыга тахсыар диэри оҥоһуллар бырассыаһа.
Бастакы оонньуубут Silver Chains диэн сюжеттаах уонна чинчийии аксыаннаах хоррор этэ. Манна араас ыйынньыктары, бэлиэлэри хомуйан быраҕыллыбыт тиэргэҥҥэ (поместье) туох буолбутун быһаарар сорук турара. 2019 сыл атырдьах ыйын 6-тыгар ПК, PlayStation, X-Box оонньуурга ананан тахсыбыта.
- Үлэҕититтэн бараат, судургу баҕайытык оонньуу оҥорон саҕалаатыгыт?
- Оччолорго хайы сах өйдөбүллээх этибит эрээри, бу жанрга уопуппут суоҕа. Бастакы холонон көрүүбүт этэ. Ону сэргэ оонньуубутун Unreal Engine диэн саҥа “игровой движокка” оҥорбуппут. Онон хас биирдии сүһүөҕү, кэрдииһи хаттаан саҕалаабыппыт: саҥаҕа үөрэммиппит, холонон, тургутан көрбүппүт. Итини таһынан оонньуубутун киэҥ эйгэҕэ таһаарар кыахтаах тэрилтэни көрдөөбүппүт уонна ньиэмэс Headup Publishing хампаанньатын кытта сөбүлэспиппит.
Сыалбытын ситиһэр туһугар туруорбут соруктарбытын биир-биир олоххо киллэрбиппит, итинник улахан хамаанда үлэтин үһүө буолан ситиспиппит.
- Үп-харчы өттүгэр хайдах этэй?
- Инбиэстэрдэри Дьокуускайтан булбуппут. Ол кимнээҕин, төһө суума буолбутун туһунан этэр кыахпыт суох, эргиэн кистэлэҥэ буоллаҕа.
- Бастакы үлэҕит тахсыаҕыттан алта сыл ааспыт, ол аата дьыалаҕыт сатанан эрдэҕэ?
- Халлаан сулустарыгар тиийдибит диир кыахпыт суох эрээри, көмпүүтэр оонньуутун оҥоруу, кырдьык, харчыны киллэрэр салаа. Биһиги курдук кыра да тэрилтэҕэ буоллун.
Уолаттар оонньууларын оҥороллоругар Антуан де Сент-Экзюпери “Маленький принц” остуоруйа-сэһэнэ санааларын кынаттаабыт.
- Daydream эһиги иккис оонньуугут дуо?
- Оннук, сүрүн үлэһиттэр үһүөйэх да буолларбыт, саҥа бырайыакка ылсыбыппыт. Эмиэ туох баарын барытын үлэлиир кэммитигэр билэн-көрөн барбыппыт, оонньуу хаамыытын, мэхээньикэтин, сюжетын, сынаарыйа эмиэ күнтэн күн суруллан испитэ. Саамай ыарахана дьон ылынар, сөбүлүүр идиэйэтин таба тайаныы этэ. Ону тэҥэ гейм-дизайнерга наадыйарбыт, хата, былырыыҥҥыттан эмиэ урут MyTonaҕа үлэлии сылдьыбыт исписэлиис кыттыһан, үлэбит биллэ түргэтээтэ.
Бу оонньуубутугар өйбүтүн-санаабытын, кыахпытын барытын уурдубут. Оонньуубут Little Nightmares курдук тыыннаах.
Little Nightmares – (англ. – “Маленькие кошмары”) – 2017 сыллаахха тахсыбыт платформер жанрдаах хоррор уонна квест элэмиэннэрдээх көмпүүтэр оонньуута.
- Онтон кэлэр оонньуугутугар хаһан ылсаҕытый?
- Саҕалаабыппыт. Дьиҥэ, 2023 сыл саҕаланаатын үһүс оонньуубутугар киирсибиппит, билиҥҥитэ прототиптааһын, о.э. бастакы барылын оҥорон көрүү, ырытыы кэрдииһигэр сылдьар. Мультиплеер (оонньуу каартатыгар оонньооччулар бэйэ-бэйэлэрин кытта киирсиилэрэ) эбэтэр кэпэрэтиип (оонньуу таһымнарын хас да буолан бииргэ ааһыы) киллэриэхпитин баҕарабыт. Бу урут холонон көрбөтөх, саҥа уобаласпыт, онон тургутан көрүөхпүт. Улахан сыалы туруоруннахха, түмүктээх үлэ тахсар.
Бу интэриэһинэй:
Daydream: Forgotten Sorrow бииргэ үлэлэһэргэ саха биллиилээх мусукаана Николай Михееви ыҥырбыттар, муусукатын уонна “сведениетин” кини оҥорбут.
Андрей Шилов кэпсэтиитин Мария Санникова тылбаастаата.
