Бу дьыл от ыйын 4 күнүттэн атырдьах ыйын 3 күнүгэр диэри Дьокуускай уонна кини таһынааҕы сирдэргэ 4-с кылаастаах баһаары утары анал эрэсиим биллэрилиннэ.
Бу кэмҥэ дьон-сэргэ ойуурга сылдьара, уот отторо, бөх уматара бобуллар. Туох, ханнык хааччахтар киирбиттэрин туһунан сиһилии куорат уокуругун дьаһалтатыгар кэпсээтилэр:
- Ойуурга баһаары бохсор эбэтэр тыа хаһаайыстыбатын наадатыгар эрэ сылдьар тиэхиньикэ киирэрэ көҥүллэнэр, онтон атыттарга бобуллар;
- Ойуурга, тыа хаһаайыстыбатын сиригэр-уотугар үлэтин соругунан сылдьар дьонтон ураты атын киһи киирэрэ бобуллар;
- Анал көҥүлэ суох сиргэ мангалынан, о.д.а. аһаҕас уоттаах тэрилинэн туттар бобуллар;
- Кутаа оттуу, бөх уматыы, өртөөһүн уо.д.а. уоту ыытар кутталлаах үлэлэри ыытыы эмиэ бобуллар.
Куорат уокуруктарын салалталарыгар, куорат таһынааҕы нэһилиэнньэлээх пууннар дьаһалталарыгар, УК-ларга уонна ТСЖ-ларга туһааннаах сирдэрин-уоттарын кураанах отун ыраастыырга, бөҕү-сыыһы хомуйарга сорудахтаатылар. Сад уонна оҕуруот табаарыстыбаларыгар уоттан сэрэхтээх буолуу туһунан сүбэ мунньаҕы тэрийэргэ сүбэлээтилэр.
Анал кэтиир уонна кэтиир-маныыр бөлөхтөр “Суһал бэлэм буолуу” эрэсиимигэр үлэлииллэр. Дьокуускайга баһаары утары анал эрэсиим биллэриллибит кэмигэр элбэх кыбартыыралаах уонна чааһынай дьиэлээх сирдэргэ баһаарынай тиэхиньикэ ааһар суолун мэһэйдиир көҥүлэ суох тутуулары бэрэбиэркэлиэхтэрэ.
ysia.ru