Ааспыт сыл аҥаарын иһигэр Саха сирин мобильнай быраастара Арктика улуустарыгар барыта 15 тыһыынчаттан тахса киһи доруобуйатын көрдүлэр. Дьон-сэргэ бырайыагы биһирээбитинэн, “Мобильнай быраас” быарайыак салҕанар буолбут. Ол туһунан Ил Дархан Айсен Николаев эппитин СИА суруйар.
Ил Дархан кэлиҥҥи сылларга өрөспүүбүлүкэҕэ доруобуйа харыстабылын эйгэтигэр улахан болҕомто мэдиссиинэ тэрилтэлэрин матырыйаалынай-тэхиниичэскэй базатын хаҥатыыга ууруллубутун эттэ. Чуолаан, бастакы сүһүөх мэдиссиинэ тэрилтэлэригэр. Улахан мэдиссиинэ дьиэлэрэ тутуллаллар. Ол иһигэр Кардиология диспансера, Онкология киинэ.
“Олус үчүгэй түмүгү көрөн эрэбит. Мин өссө төгүл медиктэри Саха сирин олохтоохторун аатыттан хамсык кэмигэр тулуурдаах үлэлэрин иһин махтанным. Мин хара бастакыттан “хамсык бүттэҕинэ медиктэр үлэлэрин биир эрэ киритиэрийинэн – төһө киһи өлбүтүнэн – сыаналыахтара” диэн эппитим. Биһиги өрөспүүбүлүкэбит хамсыктан киһи өлүүтүнэн биир бүтэһик миэстэҕэ турар. Ол – доруобуйабыт харыстабылын тиһигин үчүгэй үлэтин түмүгэ. Ол эрээри, итинэн уоскуйан хааларбыт табыллыбат. Дьон олоҕо уһатар, ыарыыны сэрэтэр, эрдэттэн булар үлэни күүһүрдүөхпүтүн наада”, – диир Айсен Николаев.
Санаттахха, быйыл Саха сиригэр “мобильнай быраас” бырайыак киирбитэ. Ол чэрчитинэн, өрөспүүбүлүкэ быраастара улуустарга баран нэһилиэнньэ диспансеризациятын ыыталлар. Ил Дархан бэлиэтээбитинэн, өскөтүн Арктика улуустарыгар барыта 70 тыһыынча киһи олорор буоллаҕына, ити бырагыраама сүнньүнэн барыта 15 тыһыынчаттан тахса киһини номнуо көрбүттэр. Бырайыак салгыы тэриллэр былааннаах.
Хаартыска: Өрөспүүбүлүкэтээҕи мобильнай биригээдэлэр кииннэрин пресс-сулууспата
Бэйэ кэр.
